O Hauppauge Broadway leva a televisión aos dispositivos móbiles de Apple

Durante a pasada edición do CES de Las Vegas Hauppauge Digital presentou unha nova solución para levar a televisión ao iPhone, iPod Touch e iPad chamada Broadway, e que sería unha caixa autónoma cun sintonizador de televisión integrado que transmitiría o sinal televisivo aos trebellos de Apple a través da Wi-Fi doméstica (802.11g ou 802.11n) ou a calquera lugar do mundo a través da Internet.
Para que estas opcións estean dispoñibles deberemos conectar o Broadway ao router doméstico, encargándose o trebello de captar o sinal de televisión terrestre ou de cable e converténdoo nun fluxo de streaming de alta calidade co compresor de vídeo H.264.
Ata o momento xa existían múltiples solucións semellantes (incluso da mesma compañía) pero estaban baseadas nun ordenador, destacando o Hauppauge Broadway por ser unha solución autónoma, aínda que o seu prezo (199 dólares) pode supor unha importante barreira para a súa popularización.