O Gaiás acolle sábado a edición galega da olimpíada de robótica
venres, 29 de xuño do 2018
Este sábado, de 9:00 a 15:00 horas, temos en
Santiago unha cita coa intelixencia artificial, a automatización, as
máquinas con capacidade de aprender e o espírito Maker.
Estamos a falar da
cuarta edición local (galega) da WRO, a Olimpíada
Internacional de Robótica, na Cidade da Cultura no Gaiás,
iniciativa organizada polo Colexio Profesional de Enxeñaría en
Informática de Galicia (CPEIG), a Federación Galega de Municipios e
Provincias (FEGAMP) e Arkitas Robótica. O
programa da cita tamén incluirá un coloquio a cargo do psicólogo e
pedagogo Javier Urra.
A WRO, para
quen non o saiba, é unha olimpíada na que nenos e nenas de
Educación Primaria, ESO e Bacharelato compiten cos seus robots en
distintas categorías e retos segundo idades. Esta competición conta
cunha fase local, unha nacional, que este ano será en Platja d’Aro,
Girona, e a internacional, que terá lugar en Tailandia en novembro
de 2018 (na segunda edición, como lembraremos, clasificouse un
colexio da Coruña na nacional en Logroño, conseguindo unha praza na
internacional de Nova Delhi). A WRO organízase organízase en máis
de 20 cidades españolas e o ano pasado competiron uns 25.000 equipos
de máis de 56 países.
Os equipos están formados por dous ou tres
participantes de entre 7 e 19 anos que deseñan, constrúen e
programan un robot con materiais LEGO. Os mellores equipos locais
celebrarán a Final Nacional en Platja d’Aro (Girona), de onde
sairán os representantes da WRO Spain para a Final Internacional da
WRO 2018.
Ademais da WRO e, co foco posto naqueles rapaces
que non compitan nesta e queiran probar outras especialidades,
celébrase o II Campionato de Sumo Arkitas e o I Campionato de Bolos
Robóticos.
Segundo informa o CPEIG, “a robótica educativa
cada vez ten máis seareiros e axuda aos nenos e as nenas a
desenvolver a súa creatividade, a súa iniciativa e a capacidade de
resolver problemas mediante un reto educativo”. A organización da
WRO GALICIA enmárcase nos obxectivos educativos no ámbito
tecnolóxico tanto do CPEIG e da FEGAMP como de Arkitas Robótica,
cuxo obxectivo común é “o desenvolvemento das vocacións
científicas e técnicas en todas as etapas educativas”.