O GRUVI fai un chamamento ao alumnado da UVigo para recuperar equipos
venres, 22 de febreiro do 2019
O Grupo
de Reciclaxe Informática da Universidade de Vigo (GRUVI), integrado
na Oficina de Medio Ambiente, vén de iniciar unha campaña para
xuntar fileiras, na comunidade universitaria, a prol da reciclaxe e
recuperación de equipos. A iniciativa de voluntariado ambiental
impulsada pola OMA require alumnas e alumnos con formación
relacionada no ámbito informático, electrónico ou eléctrico e que
estean dispostas/os a colaborar de dúas a catro horas á semana na
recuperación dos equipos, labor na que contarán coa axuda do
persoal da oficina e dun bolseiro propio do GRUVI.
“A
función principal é a recuperación de material informático, pero
este grupo cumpre tamén un obxectivo de carácter formativo xa que o
alumnado en prácticas, tanto voluntarios coma bolseiros, aprenden
moito sobre todo o que ten que ver coa recuperación de equipos”,
subliña Sergio Ramos, técnico superior da OMA. Traballarase con
todo tipo de aparellos informáticos, dende torres e pantallas,
pasando por cables, impresoras e cartuchos de tinta.
“Na
última convocatoria entregáronse 26 equipos e, recentemente,
entregáronse outros dez que sobraron desa convocatoria ao CEIP O
Sello de Cabral en Vigo”, salienta Alejandro Prado, estudante do
Grao en Enxeñaría dos Recursos Mineiros e Enerxéticos e actual
bolseiro do GRUVI. Ademais dos propios equipos da Universidade,
contan tamén con outros que proveñen das distintas campañas de
recollida dos RAEE (Residuos de Aparellos Eléctricos e Electrónicos)
promovidas pola OMA en colaboración co Green Campus de Pontevedra.
Unha
vez reparados foméntase o emprego do software libre mediante a
instalación de sistemas operativos Linux e programas de uso cotiá
tamén libres, como pode ser o caso do Libre Office.