O Consello da Cultura dixitalizará A Nosa Terra
xoves, 19 de xullo do 2018
O
Consello
da Cultura Galega dixitalizará o semanario A Nosa Terra,
unha das nosas máis históricas e senlleiras publicacións, de gran
relevancia para achegarnos historicamente aos tempos da transición e
ás orixes da autonomía galega. Os traballos previstos, que
contribuirán a un coñecemento maior da revista, e tamén á súa
preservación, foron dados a coñecer hoxe pola presidenta do CCG,
Rosario Álvarez, e polo escritor, xornalista e presidente da
Fundación A Nosa Terra, Afonso Eiré.
O
acordo entre as dúas entidades prevé a cesión provisional do fondo
da Fundación A Nosa Terra para a dixitalización e a súa posta a
disposición pública e de balde a través do web do Consello da
Cultura Galega, consellodacultura.gal.
Segundo
explicaron na xuntanza de hoxe, o semanario A Nosa Terra:
periódico galego semanal iniciou a súa andaina o dous de
decembro de 1977 e rematou en 2011, “cubrindo cun estilo
xornalístico singular a actualidade política, económica, social e
cultural de Galicia a través de contidos de longo alento”.
Para
Rosario Álvarez, presidenta do CCG, “o noso pasado máis recente é
unha parte moi importante do patrimonio cultural. A produción
xornalística das últimas décadas e acompañou á Autonomía é un
patrimonio que podemos conservar e preservar. Non só para os
investigadores actuais senón tamén para xeracións futuras”.
Segundo
Alfonso Eiré, presidente da Fundación A nosa terra, “o semanario
supuxo un xeito novo de facer xornalismo e tratar temas que ata o
momento eran marxinais na prensa, coma os sociais, o ecoloxismo, o
feminismo, o traballo ou os deportes”. Segundo engadiu, “neste
período prodúcense moitos cambios sociais e políticos e cuestións
que continúan ata hoxe, como a recuperación da memoria histórica”.
Os
fondos iranse incorporando de maneira gradual na web do CCG. Segundo
informaron Álvarez e Eiré, están xa dispoñíbeis para a súa
consulta os primeiros 26 números.