O Concello e a Cámara de Santiago dan a coñecer os premiados no certame Manuel Beiras
luns, 17 de decembro do 2018
Finalmente
o Concello de Santiago e a Cámara de Comercio local deron a coñecer
os negocios gañadores dos Premios
Manuel Beiras, dirixidos a recoñecer o compromiso lingüístico
dos comercios e empresas de Compostela e a súa contorna, un
compromiso extensíbel ás redes. As empresas que resultaron
gañadoras da nova edición (XIX) foron Leite Noso e Construcións
Alvite González. Así o anunciaron en rolda de prensa o alcalde,
Martiño Noriega, e o vogal da Cámara de Comercio, Xavier Freire,
que engadiron que os galardóns entréganse hoxe ás 20.00 horas no
Pazo de Raxoi. Na gala tamén se distinguirá o labor de Evaristo
Rodríguez Carracedo, ex vicepresidente da Cámara de Comercio. Os
galardóns xiraron este ano arredor da páxina web
www.traballamosengalego.gal.
Polo
que se refire á empresa Leite Noso, recibe o Premio Manuel Beiras na
categoría de nova incorporación ao galego. Segundo informaron
Noriega e Freire, a distinción está relacionada coa marca comercial
Deleite, a primeira etiquetada integramente en galego e que, tal e
como salienta o xurado, "coloca o noso idioma na mesa de
milleiros de fogares cada día", demostrando que o galego “é
o vehículo idóneo para presentar o principal produto do noso sector
agrogandeiro e para asocialo á riqueza do patrimonio e ao dinamismo
da cultura máis actual”.
Na
categoría de empresas cun uso continuado do galego, o galardón será
para Construcións Alvite González, “por apostar por unha
comunicación coidada, coherente e respectuosa coa nosa lingua,
facéndoa visíbel nun ámbito de actividade económica onde
habitualmente se agocha para os usos formalizados”.
Por
último, o xurado acordou conceder a distinción especial do Premio
Manuel Beiras a Evaristo Rodríguez Carracedo, avogado compostelán
que, como vicepresidente da Cámara de Comercio, “foi un dos piares
sobre os que se crearon estes galardóns e cuxo impulso e apoio foi
fundamental para que superasen a maioría de idade”. Segundo o
xurado, Rodríguez Carracedo "foi a voz da conciencia
lingüística que cada ano lembrou a importancia do compromiso
empresarial coa lingua e a necesidade de converter en feitos as
palabras de apoio".
O
xurado dos Premios Manuel Beiras estivo formado polo alcalde, Martiño
Noriega; Xavier Freire, en representación da Cámara de Comercio;
Beatriz Corral, en representación da Secretaría Xeral de Política
Lingüística; Miguel López Crespo, en representación da Unión de
Consumidores de Galicia; Belén Regueira no nome do Colexio
Profesional de Xornalistas de Galicia; María Traveso, no nome da
Mesa pola Normalización Lingüística, e os representantes das
empresas premiadas na pasada edición dos galardóns.
Como
lembraremos, o Premio Manuel Beiras ten distinguido iniciativas e
proxectos de natureza claramente dixital, como por
exemplo a asociación Puntogal para o impulso dun dominio
específico galego (.gal), a empresa
de comercio electrónico Buydeal, ou a
firma de tecnoloxías lingüísticas Imaxin, entre outras moitas.
O
ano anterior, o galardón foi dar á produtora Illa Bufarda; e o
premio para a empresa que se incorporara recentemente ao uso do
galego recaeu na empresa de fabricación de xogos e xoguetes
Brazolinda. Amais, a distinción especial do xurado foi para o
Colexio de Avogados de Santiago.
Respecto
da campaña de promoción deste ano tivo, como dixemos, unha
importante vertente en liña a través das redes sociais e a través
de www.traballamosengalego.gal.
Segundo explicou Martiño Noriega, “quixemos construír a imaxe
dixital dos Manuel Beiras, cun lugar de referencia para obter
información sobre a convocatoria actual e as anteriores”. Desta
maneira e para xerar interese entre a cidadanía, Santiago viuse
ateigada os días pasados de cartaces nas beirarrúas e material
publicitario con diversos textos-reclamo e un convite a visitar
traballamosengalego.gal. Por certo que esta páxina está
redireccionada cara a dos Premios Manuel Beiras, na que se poden
atopar as listas de gañadores de edicións anteriores, as bases da
convocatoria e numerosos recursos gráficos sobre os galardóns.