O Concello de Ourense abre as portas do seu novo Telecentro de Comunicación
luns, 29 de xuño do 2009
A Rede de Telecentros de Comunicación, dependente da
Secretaría Xeral de Medios da Xunta de Galicia, vén de botar man dos seus
recursos (sempre dispoñibles para achegarlle as TIC a todos os galegos e
galegas sen excepcións) para abrir un
novo TC nos nosos lindes, e posibilitarlle aos seus veciños e veciñas a
integración total na Sociedade da Información. Desta volta, a Rede fixo a súa
parada no Concello de Ourense, onde, no número 44 da rúa do Progreso, vén de
abrir,
un novo Telecentro de Comunicación.
Ata alí poderán achegarse dende esta mesma mañá, ademais
de tódolos veciños e veciñas da zona interesados nas ferramentas TIC, todo tipo
de Asociacións e colectivos da comarca, que poderán usar este Telecentro de
Comunicación (TC) para realizar cursos,
roldas de prensa, videoconferencias, reunións de traballo, visionado de
audiovisuais, conferencias, etc... en horario de 9:00 a 14:00 e de 17:00 a
21:00 horas.
A Secretaría Xeral de Medios colabora co concello
na dotación e instalación de equipos audiovisuais e multimedia no TC, así como
no seu mantemento tecnolóxico. Asemade, incorpora o concello á Rede de
Telecentros de Comunicación (RTC) para que se beneficie do traballo
colaborativo en rede e da comunidade virtual da RTC.
Ademais de dotar aos Telecentros de Comunicación
do equipamento axeitado, a Xunta de Galicia busca, segundo veñen de afirmar os
seus responsables, “que adquiran un
dinamismo”, polo que están a desenvolver proxectos que permitan aproveitar
as sinerxias que xorden da administración autonómica e da local.
Un dos obxectivos da Secretaría Xeral de Medios é, segundo
afirmaron, “converter o telecentro de
comunicación nun punto de encontro dentro do concello, conseguindo incorporalo
como alternativa habitual na axenda de tempo libre da cidadanía”.
O Telecentro de Ourense
O Telecentro de Comunicación do Concello
de Ourense, ao igual que os demais centros que a Rede ten espallados por toda a
xeografía galega, é un espazo acondicionado acusticamente e de estética
particular que dispón de material informático (ordenadores, impresoras, etc.),
equipo de videoconferencia, material audiovisual, pantallas de proxección e de
plasma, así como outros sistemas de control que permiten recrear diferentes
escenarios (accións formativas, videoconferencias, visionado de audiovisuais ou
multimedia) dependendo das necesidades técnicas do evento que se queira
desenvolver.
En concreto, este Telecentro conta con 20 postos informáticos con lector de
DNI electrónico, DVD, Monitor TFT,
Headset con micrófono e control de volume, Windows XP e Paquete software
ofimático e multimedia así como con un posto de profesor con lector de DNI
electrónico, DVD gravador, Monitor TFT, Headset
con micrófono e control de volume, Windows XP e Paquete software ofimático e
multimedia.
Tamén dispón
de impresora láser cor, proxector con pantalla de proxección motorizada,
pantalla de plasma de 42”
e un Rack multimedia formado por
mesas de mesturas de radio, amplificador e DVD-RW con TDT integrado.
Trátase dun servizo público e gratuíto para todos os
cidadáns financiado pola Secretaría Xeral de Medios, que se desenvolveu en
colaboración co Concello de Ourense.
Actualmente, a Rede de Telecentros de
Comunicación de Galicia dispón de TC nas localidades de Coruña, Abegondo,
Arzúa, Betanzos, Boiro, Carballo, Melide, Muros, Negreira, Oroso, Santa Comba,
Santa Comba, Ribeira, Santiago, Vedra, Vimianzo, Allariz, Castro Caldelas, O
Baro de Valdeorras, O Carballiño, Ourense, Verín, Xinzo de Limia, A Fonsagrada,
Becerreá, Chantada, Foz, Guitiriz, Lugo, Monforte de Lemos, Monterroso,
Quiroga, Sarria, Viveiro, A Cañiza, A Estrada, Catoira, Lalín, Marín, Ponteareas,
Pontevedra, Redondela, Tui, Vigo e
Vilagarcía de Arousa.