O Concello de Lugo presenta a web para consultas e reservas da Biblioteca Municipal
xoves, 19 de xaneiro do 2017
A Biblioteca Municipal de Lugo vén de facer
reconto da súa actividade tecnolóxico-dixital e, tamén, revisión
das novidades para este 2017. Entre estas últimas figura como
novidade estrela unha nova páxina web para facermos consultas e
reservas de fondos a través da Internet. O sitio, un catálogo
dixital, está xa dispoñíbel en biblioteca.lugo.gal
e máis a través da web municipal, lugo.gal.
Estes e outros datos foron
dados a coñecer no salón de plenos do consistorio pola concelleira
de Cultura, Turismo e Promoción da Lingua, Carmen Basadre, quen
lembrou que a Biblioteca conta a día de hoxe con preto de 38.000
exemplares e 12.000 usuarios. Ademais, engadiu, realizou 22.041
préstamos durante o 2016, no que se deron de alta 327 persoas.
Volvendo ao catálogo dixital, Basadre sinalou que
“ten como obxectivo a localización de información dunha forma
sinxela e rápida, así como ofrecer diversos servizos que estaban
sendo demandados polos propios usuarios da biblioteca”. Tamén
explicou que o acceso ao catálogo permite a visualización dos
resultados de cada procura cos datos bibliográficos do documento e
ofrece ligazóns sobre os seus autores e materias. Engadiu que para
tirarmos partido da ferramenta, non é preciso que esteamos
rexistrados.
Porén, apuntou, quen si que estea dado de alta na
Biblioteca terá á súa disposición unha serie de servizos
tecnolóxicos “extra”, como por exemplo recibir mensaxes
relativas a reservas, devolucións e informacións de interese,
visualizar o histórico dos préstamos, renovar préstamos, reservar
exemplares, suxerir documentos para a súa compra ou incluír temas
ou autores de interese (permitindo que cando unha nova obra sexa
catalogada e atenda aos datos incluídos polo usuario, este reciba un
correo electrónico comunicándolle a nova incorporación).
Reconto do 2016
A concelleira, no ámbito do balance do ano que
vimos de deixar atrás, sinalou que na actualidade, o número de
usuarios inscritos no servizo de préstamo da Biblioteca Municipal é
de preto de 12.000, dos cales máis de 10.000 son adultos e 1.300
nenos, dándose de alta neste servizo 327 novos usuarios durante o
2016. “Un servizo”, dixo, “que se reforza ano tras ano coa
constante actualización e ampliación do seu fondo bibliográfico
que conta a día de hoxe con 37.944 exemplares, dos que 31.642 son
libros, 14.005 infantís e 17.637 adultos; 4.440 documentos
audiovisuais, 1.361 documentos sonoros e 501 documentos
electrónicos”.