O Concello de Ames solicita unha aula CeMIT para O Milladoiro
mércores, 10 de abril do 2019
O
Concello de Ames quere
amplificar a alfabetización dixital da súa cidadanía, un proceso
que, na súa opinión, pasa de xeito inevitábel pola posta en marcha
dun espazo de divulgación e formación tecnolóxica no outro grande
núcleo de poboación do termo municipal, amais de Bertamiráns: O
Milladoiro. Por este motivo, o Executivo local vén de solicitar ao
Goberno galego a apertura dunha aula CeMIT
nesta segunda localidade. O escrito remitíuselle en marzo á axencia
AMTEGA, da que dependen as ditas aulas de alfabetización dixital,
integrantes da rede CeMIT.
Nesta
carta, o alcalde José Miñones facía referencia “á necesidade de
que Ames conte con máis dunha aula deste tipo, tanto pola fisionomía
do concello como polo importante número de habitantes aos que dá
acubillo”. Entre os motivos que propiciaron esta solicitude
enumerase “a fisionomía dun concello que conta con dous
importantes núcleos urbanos e diversos núcleos rurais, e que supera
os 31.000 habitantes”.
No
escrito, o rexedor fai fincapé nas vantaxes de habilitar unha aula
CeMIT no Milladoiro: “Esta infraestrutura posibilitaría a
realización dun maior número de cursos e formacións de
especificación tecnolóxica, así como a realización de outras
actividades ao abeiro dos programas de conciliación que na
actualidade non poden realizarse pola falta deste espazo”. Segundo
o Goberno local, a petición responde a unha “demanda reiterada dos
veciños e veciñas do Milladoiro e arredores a que se ofreza unha
oferta semellante á de Bertamiráns nese núcleo”.