O Clúster TIC envorcará esforzos en dixitalizar o noso sector turístico
mércores, 15 de maio do 2019
O
sector turístico galego vai voar alto coa axuda das novas
tecnoloxías e dos novos servizos dixitais desenvolvidos aquí. Así
o fixeron saber o Clúster
TIC e o Clúster
Turismo de Galicia, que veñen de formalizar un
acordo de cooperación para traballar a prol da competitividade do
sector turístico: avanzar en sinerxías e coa vista posta na
colaboración e na aposta polas TIC como “valores fundamentais”
para as empresas do dito sector.
Segundo
fixo saber na sinatura do acordo o presidente do Clúster do Turismo
de Galicia (CTG), Cesáreo Pardal, “a cooperación está no noso
ADN como clústeres e por iso debemos traballar para impulsar
proxectos que sexan de proveito para as empresas do sector TIC e do
turismo, especialmente no contexto actual no que as novas tecnoloxías
impregnan o desenvolvemento dun sector tan competitivo e cambiante
como o noso”. O convenio foi formalizado na Cidade da Cultura e na
compaña do tesoureiro do Clúster TIC, Gerardo José García Alvela.
Segundo
engadiron, a sinatura deste protocolo supón “un paso máis no
traballo conxunto entre ambas as entidades”, que xa xuntaron forzas
para o desenvolvemento de actividades ao redor das novas tecnoloxías
e o sector turístico. “A actividade do sector TIC”, engadiron,
ten un impacto moi claro no sector turístico, especialmente no que
se refire á competitividade, á comercialización e á forma en que
os visitantes experimentan a súa visita a Galicia”.
O
presidente do Clúster TIC, Antonio Rodríguez del Corral, recalcou a
importancia da dixitalización do devandito sector: “Os usuarios
demandan no seu lecer e nas súas actividades turísticas a
accesibilidade e a axilidade coa que contan noutros ámbitos da súa
vida. Isto xera un amplo abano de posibilidades de novo negocio que
aínda non foron explotadas e que contribuirá a potenciar a
innovación dun dos sectores clave para a economía de Galicia”.
Nun
plano máis concreto, a cooperación entre ambas as entidades
permitirá avanzar en até 17 accións establecidas na Estratexia do
Turismo de Galicia 2020 como poden ser na mellora do coñecemento do
perfil do turista a través da análise de información a gran escala
(Big Data), a posta en marcha de programas informáticos para
a formación ou a toma de decisións empresariais, o impulso do smart
turismo, o desenvolvemento de aplicacións móbiles, a elaboración
de estudos de mobilidade en colaboración coa AMTEGA, o avance nas
oficinas de información turística ou o impulso cara á excelencia
en materia de comercialización ou promoción do sector coa recollida
de datos sobre os viaxeiros, captando información sobre eles e
traballando na súa captación e na fidelidade aos nosos destinos.
O
presidente do CTG tamén salientou que a sinatura deste protocolo
supón tamén a fixación de xuntanzas periódicas de networking
e innovación que permitan ás empresas do sector turístico
exporlles aos asociados do Clúster TIC as súas necesidades,
requisitos e obxectivos de competitividade, mentres que as empresas
tecnolóxicas elaborarán proxectos que respondan a estas demandas.