O CiTIUS acolle un relatorio sobre Intelixencia Colectiva

O catedrático da Universidade Carlos III de Madrid e especialista en Intelixencia Artificial, Aníbal Figueiras, participará nunha nova edición do ciclo Investigadores de Prestixio, programa de conferencias con investigadores visitantes organizado polo CiTIUS, explicando como poden usarse as técnicas de Intelixencia Computacional para analizar a información asociada a diferentes propósitos, no marco dun modelo coñecido como Intelixencia Colectiva; o seu funcionamento imita en certos aspectos ao comportamento social, ámbito no que as decisións non se toman a título persoal, senón buscando un consenso nas respostas.
Este tipo de aproximacións resultan especialmente prometedoras en aplicacións con grandes cantidades de datos, como as Smart Cities ou a tele-medicina. No ámbito da e-Saúde as técnicas de Intelixencia Colectiva permitirían que unha serie de sistemas intelixentes traballen de xeito coordinado para ofrecer diferentes interpretacións dos síntomas dun paciente, facendo unha diagnose de consenso a partir das respostas obtidas.
Aníbal Figueiras é doutor enxeñeiro en Telecomunicacións pola Universidade Politécnica de Barcelona, catedrático dende 1978 e con docencia nas universidades politécnicas de Madrid e Barcelona, así como na Universidade de Santiago de Compostela. A súa investigación e docencia oriéntase ás comunicacións dixitais, o tratamento dixital da información e a aprendizaxe das máquinas. Poderemos velo o 11 de abril ás 12:00 horas no Salón de Actos do CiTIUS.