O Centro Multimedia de Galicia desenvolve un curso de edición dixital de audio
mércores, 9 de decembro do 2009
A edición de
son está a experimentar unha grande transformación e apertura de cara aos
usuarios coa chegada dos formatos dixitais, permitindo unha grande redución de
custes en canto á adquisición de equipos e materiais de edición que, ata o de
agora, precisaban dun desembolso e duns coñecementos cos que non todo o mundo
podía contar.
Dado que a día
de hoxe case é unha tecnoloxía accesible para calquera usuario, e calquera
persoa pode realizar tarefas básicas de edición de audio cun acabado similar ao
de calquera profesional coa simple adquisición dun ordenador básico e programas
baseados en software libre, son moitas as persoas interesadas en mellorar os
seus coñecementos neste campo e realizar pequenos traballos caseiros cos que
sorprender a amigos e familiares ou incluso facer algún regalo orixinal.
É por isto que
o Centro Multimedia de Galicia vén de poñer en marcha un curso de edición
dixital de audio que se desenvolverá a partir da vindeira semana nos
telecentros de comunicación de Sarria, Chantada, Lugo, Tui, Catoira, Vimianzo,
Melide, Verín, Oroso, Lalín, Ourense, A Estrada, Allariz e Xinzo de Limia.
Este curso, de
carácter gratuíto, vai dirixido a todos aqueles interesados na edición
profesional de son que busquen un punto dende o que comezar, será de catro
horas de duración e desenvolverase de 16.30 a 20.30 horas. Os interesados aínda poden
inscribirse chamando ao 902 922 270 ou a través da web oficial do Centro. O
número de prazas é limitado.
O obxectivo
deste curso de edición dixital de audio, organizado pola Secretaría Xeral de
Medios a través da campaña Comunícate
do Centro Multimedia de Galicia, é que o alumnado, ao rematar, “obteña unha visión completa sobre os
diferentes formatos de audio dixital sendo capaz de manexalos e editalos”. Os alumnos e alumnas traballarán co programa
de edición de audio Audacity, baseado
en software libre.
Este curso forma parte das iniciativas que dende o Centro Multimedia de
Galicia se realizan para “contribuír na
formación de futuros profesionais e potenciar, deste xeito, o sector audiovisual e multimedia galegos”.