O Campus de Ourense convoca unha nova edición do seu concurso escolar sobre mulleres e nenas na ciencia
martes, 29 de novembro do 2022
A
Facultade de Ciencias, a Escola de Enxeñaría Aeronáutica e do
Espazo e a Escola Superior de Enxeñaría Informática do Campus de
Ourense convocan
a sétima edición do Concurso Escolar de Creación Artística do Día
Internacional da Muller e a Nena na Ciencia. Poden presentar os
seus traballos as alumnas e alumnos de Educación Primaria e de
Educación Secundaria Obrigatoria de centros educativos ourensáns.
As propostas terán que versar sobre a muller na ciencia e na
enxeñaría. Poden achegar contribucións até o 20 de xaneiro de
2023.
Os
obxectivos da iniciativa, que conta co apoio da Unidade de Igualdade
da Universidade de Vigo, son “promover o coñecemento por parte do
alumnado do papel das mulleres na ciencia e na enxeñaría e as súas
achegas ao desenvolvemento humano ao longo da historia; establecer un
certame que axude a visualizar este papel e chamar a atención do
alumnado preuniversitario sobre a ciencia, a enxeñaría e a súa
contorna”.
A
actividade, engaden, celébrase co gallo da conmemoración o 11 de
febreiro do Día Internacional da Muller e a Nena na Ciencia.
Como
dixemos, a participación está aberta a alumnado de Educación
Primaria e Educación Secundaria Obrigatoria matriculado nos centros
educativos da provincia de Ourense, establecéndose unha categoría
para cada unha destas etapas educativas.
As
modalidades para participar son dúas, podendo cada estudante
participar exclusivamente nunha das modalidades cun único traballo,
que deberá ser inédito e orixinal. En primeiro lugar, a modalidade
visual está aberta a debuxos realizados con calquera material
(lapis de cores, rotuladores, recortes para colaxe...) e recursos
como o son, o vídeo ou a fotografía para crear obras ou propostas
artísticas. Enviaranse en formato dixital ao enderezo da
organización do concurso e non levarán o nome do autor ou autora de
forma visíbel. As fotografías remitiranse en alta resolución
(mínimo 1920 x 1080 píxeles), cun tamaño máximo de 20 MB. Os
vídeos poden ter unha duración que oscile entre os 30 segundos e os
2 minutos. Os debuxos tamén deberán ser escaneados en alta
resolución.
En
segundo lugar, na modalidade literaria pódense presentar
manuscritos escritos a man ou a computador e que, en calquera caso,
enviaranse en formato dixital ao enderezo da organización do
concurso. A extensión máxima do traballo será de aproximadamente
900 palabras, o que equivale aproximadamente ás dúas caras dun
folio de tamaño A4, e non levarán o nome da autora ou autor de
maneira visíbel. Deberá ser unha obra inédita e orixinal,
especificando desde a organización que non se poden presentar
resumos do que xa está escrito en Internet. Os traballos poderán
estar escritos en galego ou en castelán nos xéneros de poesía e
narrativa (contos, relatos).
O
tema común dos traballos serán os referentes femininos nas
disciplinas CTEM (Ciencia, Tecnoloxía, Enxeñaría e matemáticas),
como enxeñeiras, oceanógrafas, informáticas, matemáticas,
físicas, biólogas, vulcanólogas, químicas, inventoras.
Un
xurado composto por profesorado da Facultade de Ciencias, da Escola
de Enxeñaría Aeronáutica e do Espazo e da Escola Superior de
Enxeñaría Informática realizará a proposta de traballos
gañadores. Na modalidade visual valorarase “a calidade técnica, a
orixinalidade, a creatividade e o tratamento da temática do
concurso” e na literaria “o estilo, a capacidade de razoamento, a
orixinalidade e o tratamento da temática do concurso”. Haberá
tres premios por cada unha das categorías e das modalidades. Os
traballos premiados pasarán a ser propiedade da organización do
certame e as autoras e autores cederán os dereitos de reprodución
das súas obras. A entrega de galardóns será nun acto especial que
se celebrará no Campus de Ourense na primeira quincena de febreiro
coincidindo cos actos de conmemoración do Día Internacional da
Muller e da Nena na Ciencia.