O Campus de Ferrol homenaxea a Ángela Ruiz, a precursora do libro electrónico
mércores, 15 de maio do 2019
A
Biblioteca da Escola Politécnica Superior do Campus de Ferrol vai
homenaxear esta semana á precursora do libro electrónico, a
escritora e inventora galega Ángela Ruiz Robles. A conmemoración
será este xoves 16 de maio, coincidindo co Día Internacional da
Muller, coas vésperas do Día das Letras Galegas e o Día da
Internet (as dúas festividades o 17 de maio) e coa recente
celebración internacional do Día das Rapazas nas TIC. O acto
consistirá no descubrimento dunha placa e previsto para as 13:15.
Na
cita participarán a vicerreitora do Campus de Ferrol e
Responsabilidade Social, Araceli Torres Miño; o director da escola,
Armando Yáñez Casal; a bibliotecaria do centro, Beatriz Regueira
Guntín; e tres das netas da homenaxeada, Elvira, Carmen e Marisa
Souto Grandel.
A
iniciativa de homenaxe enmárcase dentro do programa de actos
deseñado pola Rede de Docencia e Investigación con Perspectiva de
Xénero e a Oficina de Igualdade de Xénero da Universidade da Coruña
para conmemorar o Día Internacional da Muller. Nesta liña de
recoñecemento ás contribucións femininas á ciencia e á
tecnoloxía, a Facultade de Enfermaría e Podoloxía adicáballe unha
aula do centro á precursora da enfermaría profesional moderna e
creadora do primeiro modelo conceptual desta especialidade, a inglesa
Florence Nightingale.
A
profesora e inventora Ángela
Ruiz foi a responsábel directa do aparello tecnolóxico
considerado como “o libro electrónico dos anos cincuenta”, un
prototipo que puidemos ver in situ no Museo de Tecnoloxía e
Ciencia da Coruña e que malia non ter sido finalmente
comercializado no seu tempo (sobre todo por mor dos escasos apoios
orzamentarios que acadou a desenvolvedora) mostrou un importante
potencial para o ensino interactivo e para ceibar aos nenos de ter
que carrexar ás escolas inxentes cantidades de libros (o seu libro
electrónico permitía ler diferentes volumes inseridos en carretes).
O dispositivo foi orixinalmente amosado ao mundo en 1949.
Ángela
Ruiz naceu o 28 de marzo de hai 121 anos. Malia ter a súa orixe en
León, pasou na nosa terra a maior parte da súa vida, máis polo
miúdo en Ferrol. Naceu na localidade de Villamanín o 28 de marzo de
1895 e morreu o 27 de outubro de 1975 en Ferrol. Foi nesta cidade
onde dona Angelita exerceu como mestra e tamén como
desenvolvedora pioneira de material tecnolóxico ao servizo do
coñecemento.