O CPIICYL premia a traxectoria profesional do presidente do CPEIG, Fernando Suárez
mércores, 20 de maio do 2015
O presidente do Colexio Profesional de
Enxeñaría en Informática (CPEIG), Fernando Suárez Lorenzo, recolleu na noite do
pasado día 15 de maio o Premio i3 á
Traxectoria Profesional que lle concedeu o
Colexio de Informáticos de Castela e León dentro da gala celebrada no
Mirador de Cristal do Museo da Ciencia de Valladolid.
Entre os méritos que se lle recoñecen,
destaca o prestixio de Suárez Lorenzo dentro do sector e dentro do colectivo
profesional da Enxeñaría en Informática. Responsable na actualidade de
Innovación do Concello de Santiago de Compostela, forma parte moi activamente
do movemento que impulsa as cidades intelixentes (Smart Cities) en España.
No eido colexial, é o vicepresidente primeiro
do Consello Xeral da Enxeñaría Informática (CCII nas súas siglas en castelán) desde
a súa fundación e presidente do CPEIG tamén desde a súa creación no ano 2007.
Enxeñeiro en Informática pola Universidade da
Coruña, é profesor de diferentes masters na Universidade de Santiago de
Compostela. Así mesmo, colabora coa Axencia da Calidade do Sistema
Universitario de Galicia e con ANECA na comisión de avaliación de diferentes
titulacións no eido das enxeñarías e da Enxeñaría en Informática.
Nas
palabras que pronunciou ao recoller o galardón, o presidente do CPEIG destacou
que a profesión “está cambiando o noso
mundo a unha velocidade sen precedentes”
e destacou o compromiso do profesional “claro e irrenunciable, en construír
unha sociedade da información centrada na persoa, inclusiva e onde todos poidan
crear, acceder, empregar e compartir a información e o coñecemento, para
permitirlle ás persoas, comunidades e pobos acadar o seu pleno potencial na
promoción do seu desenvolvemento sustentable e a mellora da súa calidade de
vida”.
Asegurou
que facía partícipe do seu premio a “tantas persoas que me axudaron nestes
anos, cun agradecemento especial aos membros das distintas xuntas do CPEIG e do
CCII”. Así mesmo, tamén
tivo unhas palabras emocionadas de
agradecemento para a súa familia.
- A entrega do galardón fíxose durante a celebración da Noite da Enxeñaría en Informática de Castela e León