O CPEIG recoñece o labor de Código Cero a prol da divulgación informática
luns, 24 de outubro do 2011
- O equipo de Código Cero participando na gravación do programa Banda Ancha da Radio Galega
O
Colexio Profesional de Enxeñaría en Informática de Galicia, CPEIG,
vén de comunicar a resolución dos seus premios Fin de Carreira e
Comunicación Informática. O primeiro, apunta o colexio nun
comunicado, irá dar a mans de Daniel Fernández Núñez, natural do
Barco de Valdeorras, quen se impuxo sobre os seus competidores nesta
segunda convocatoria do dito galardón grazas ao seu traballo Deseño
e Implementación dun MON (Message
Oriented Middleware) Escalable en Java para Aplicacións Financeiras.
Polo
que respecta ao segundo dos premios, sinalar que nos colle ben de
preto en Código Cero. De feito, máis preto imposíbel, posto que
vai dar, precisamente, ao Grupo Código Cero Comunicación pola súa
contribución, vía codigocero.com, na achega de coñecemento
informático, innovador e tecnolóxico, dende unha óptica galega, en
galego e facendo fincapé en iniciativas de aquí.
Dende
o grupo aproveitamos para agradecerlle ao CPEIG este recoñecemento,
que tantos azos nos dá para seguir traballando nunha cuestión que
consideramos prioritaria: levar a divulgación TIC a tódolos
recantos posíbeis.
Lembrar
que en Código Cero vimos
de celebrar o décimo aniversario da nosa web e que en breve
faremos o mesmo coa revista do mesmo nome. O grupo foi fundado por Xosé María Fernández Pazos, Marcus Fernández e Carlos Ballesteros.
A
entrega dos premios terá lugar o vindeiro venres, día 28 de
outubro, no transcurso da Terceira Noite da Enxeñaría en
Informática, na que o interese común da defensa da Informática
reunirá unhas 300 persoas no Hostal dos Reis Católicos, en Santiago
de Compostela, relacionadas co sector TIC.
Volvendo
a Daniel Fernández Núñez, formado na Universidade da Coruña,
sinalar que acadou a máxima cualificación, un 10, na convocatoria
de setembro de 2011. O traballo premiado, informa o CPEIG, está
sendo obxecto dun proxecto de valorización comercial e transferencia
de tecnoloxía a nivel internacional nun ámbito no que este tipo de
proxectos se valora en máis de un millón de euros, “o
que pon de manifesto a madureza e a proximidade ao mercado desta
solución”, segundo
salienta o premiado. Aínda que varias multinacionais TIC
manifestaron o seu interese en adquirir esta tecnoloxía, a decisión
final foi apostar pola maduración do proxecto en Galicia,
inicialmente no seo da propia UDC.
Como
xurado da modalidade Proxecto Fin de Carreira actuaron: Alberto
Valderruten Vidal, decano da Facultade de Informática da Coruña;
María José Carreira Nouche, subdirectora da Escola Técnica
Superior de Enxeñaría da USC; Enrique Barreiro Alonso, director da
Escola Superior de Enxeñaría Informática da Universidade de Vigo;
Francisco Bago Castro, vogal do CPEIG e Fernando Suárez Lorenzo,
presidente do CPEIG.
Na
modalidade Comunicación
Informática, como
dixemos, resultou
gañador o diario electrónico Código Cero, polo seu “intenso
e rigoroso labor informativo a prol do sector TIC e da Enxeñaría en
Informática en concreto”, segundo
fixo saber o xurado.
Foron xurado desta modalidade: Xosé Pereira, decano da Facultade de
Ciencias da Comunicación da USC; Hernán Vila, vicepresidente do
CPEIG; Francisco Bago, vogal do CPEIG, e o presidente do colexio,
Fernando Suárez Lorenzo.
Os
gañadores recibirán os seus galardóns o vindeiro venres, xunto cos
seguintes premiados:
· Premio á Facultade de Informática
da Coruña polo seu 25 aniversario.
· Premio á Traxectoria Profesional:
Juan Pazos Sierra, primeiro doutor en Informática e catedrático de
Enxeñaría do Coñecemento de España. Foi director do primeiro
laboratorio de intelixencia artificial de España.
· Premio Iniciativa Empresarial:
saída da consultora tecnolóxica Altia ao Mercado Alternativo
Bursátil (MAB).
· Premio Iniciativa da
Administración: proxecto Abalar, Xunta de Galicia.
· Premio Iniciativa Emprendedora:
Iniciador Galicia. Punto de encontro para os emprendedores TIC
galegos que xa conta con máis de 25 eventos, máis de 1.200
asistentes, máis de 900 seguidores por streaming,
1.700 followers
en twitter e 350 seareiros en linkedin.
Patrocinadores
Como
en ocasións anteriores, o CPEIG conta co patrocinio de diversas
empresas e institucións para a organización da gala e dos premios.
Colaboran como patrocinadores de ouro: Altia, Bahia Software, Bull,
Everis, Hewlett-Packard,
Plexus, Telefónica e Xunta de Galicia; como patrocinador de prata, o
Concello de Santiago e como patrocinadores de bronce: Coremain, El
Corte Inglés, Insa, Retegal, Tecnocom, Treelogic e La Caixa.