O CPETIG e o CPEIG rexeitan o trato ás enxeñarías en Informática amosado no Proxecto de Lei de Servizos Profesionais

Marcos Mata, presidente do Colexio Profesional de Enxeñaría Técnica en Informática de Galicia, CPETIG

Segundo se fai saber estes días dende determinados medios acerca dos contidos da vindeira Lei de Servizos Profesionais, os colectivos de profesionais da Informática (enxeñeiros técnicos e enxeñeiros en Informática) poderían ficar excluídos de importantes garantías, dereitos e recoñecementos do seu labor actual e da experiencia que acubillan tras eles (máis de 25 anos traballando como tales profesións en España). En virtude disto, a resposta dos colectivos que os aglutinan non se están deixando agardar, procedentes de tódolos recantos do Estado. Incluídos colectivos galegos: o Colexio Profesional de Enxeñaría Técnica en Informática de Galicia (CPETIG) e o Colexio Profesional de Enxeñería en Informática de Galicia (CPEIG).
O CPETIG, sen ir máis lonxe, púxonos ao tanto esta mesma mañá da súa posición ao respecto, adheríndose oficialmente a un comunicado específico sobre o trato ás Enxeñerías en Informática ante o o Proxecto de Lei de Servizos Profesionais. En definitiva, o colexio galego súmase á postura feita pública pola Comunidade Profesional, Académica e Educativa, que alerta de que a devandita consideración que incluiría o Proxecto de Lei de Servizos Profesionais suporía un agravio inaceptable respecto ao resto de profesións de enxeñaría e de graves consecuencias.
O comunicado ven asinado polo Consello Xeral de Colexios Oficiais de Enxeñaría Técnica en Informática (CONCITI), o Consello Xeral de Colexios Oficiais de Enxeñaría en Informática (CCII), a Conferencia de Directores e Decanos de Enxeñaría Informática (CODDII) e a Reunión de Estudantes de Enxeñarías Técnicos e Superiores en Informática (RITSI).