O CPEIG recoñece a Miguel A. Amutio e á enxeñeira en Informática cambadesa Aida Vidal
martes, 24 de novembro do 2020
O
Colexio Profesional de Enxeñaría en Informática de Galicia (CPEIG)
deu a coñecer os nomes dos destinatarios do Premio Colexiado de
Honra e do Premio Proxecto Fin de Mestrado. O
Premio Colexiado de Honra irá dar a mans de Miguel A. Amutio,
polas súas importantes contribucións ao desenvolvemento da
Administración Electrónica en España. Pola súa banda, o
Premio Proxecto Fin de Mestrado recaerá na cambadesa Aida Vidal,
polo relevante potencial do seu proxecto de aplicación móbil de
Realidade Aumentada con capacidade para minimizar a ansiedade e
incentivar a actividade física en pacientes pediátricos de
hospitalización de longa duración. As dúas distincións serán
entregadas no marco da XII Noite da Enxeñaría en Informática de
Galicia, a gran festa anual do CPEIG, prevista para o 27 de novembro,
en formato adaptado ás normas anti-COVID, no Hotel OCA Puerta del
Camino de Santiago de Compostela.
Miguel
A. Amutio Gómez é director da División de Planificación e
Coordinación de Ciberseguridade da Secretaría Xeral de
Administración Dixital e da Secretaría de Estado de Dixitalización
e Intelixencia Artificial do Ministerio de Asuntos Económicos e
Transformación Dixital. Neste posto, desenvolve a dirección técnica
e estratéxica do Centro de Operacións de Ciberseguridade da
Administración Xeral do Estado e os seus organismos públicos, así
como o desenvolvemento e aplicación do Real Decreto 3/2010 Esquema
Nacional de Seguridade e as súas Instrucións Técnicas de
Seguridade, ambas en estreita colaboración co Centro Criptolóxico
Nacional (CCN).
Amutio
é licenciado en Informática pola Universidade de Deusto (1988) e é
titular das certificacións profesionais CISA, CISM e CRISC. Tras
unha etapa de seis anos no sector privado, en 1994 ingresou como
funcionario en prácticas no Corpo Superior de Tecnoloxías da
Información e realizou as prácticas na Dirección Xeral de
Informática Presupuestaria e na Subdirección Xeral de Custos de
Persoal e Pensións Públicas.
Co
seu nomeamento de funcionario de carreira, no posto de Técnico
Superior de Tecnoloxías da Información incorporouse en 1995 ao
Ministerio de Administracións Públicas, na Subdirección Xeral de
Coordinación Informática. Posteriormente, desde 1998 foi
conselleiro técnico de Normas Tecnolóxicas. A partir de 2006 foi
xefe de Área de Planificación e Explotación. Desde 2014 a 2018,
exerceu de subdirector adxunto na Subdirección Xeral de Coordinación
de Unidades TIC.
O
CPEIG salienta o seu importante traballo na coordinación do
desenvolvemento e coordinación dos esquemas nacionais de
interoperabilidade e seguridade e as súas respectivas normas
técnicas, actuando no eido dos comités e grupos da Unión Europea,
así como na difusión e comunicación.
O
Colexio tamén lembra que Amutio coordina e edita diversas
publicacións oficiais, como guías técnicas para a dixitalización
electrónica da Administración Pública. Contribuíu tamén a
múltiples publicacións, revistas e obras colectivas en temas de
servizos transfronteirizos e Unión Europea, seguridade, auditoría,
interoperabilidade, estándares, documento electrónico, entre
outros. Recibiu diversos premios e recoñecementos pola súa
contribución ao desenvolvemento do Esquema Nacional de
Interoperabilidade e do Esquema Nacional de Seguridade.
Polo
que se refire ao XI Premio Proxecto Fin de Carreira/ Mestrado en
Enxeñaría en Informática, que ten unha dotación económica de
1.000 euros, recaeu en Aida Vidal Balea (Cambados, 1995),
investigadora de novas tecnoloxías de Realidade Aumentada, polo seu
proxecto Aplicación gamificada mediante realidade aumentada para
incentivar a actividade física de pacientes pediátricos de longa
estancia, como Traballo Fin de Mestrado na Universidade da Coruña
(UDC).
Neste
proxecto, Aida Vidal desenvolve unha aplicación móbil que serve
para motivar a pacientes pediátricos e potenciar a súa actividade
física, ao mesmo tempo que se pretende reducir o nivel de ansiedade
provocado tralo ingreso hospitalario. Para realizar esta aplicación,
Aida Vidal explica que se empregaron tecnoloxías de Realidade
Aumentada para fomentar o movemento dos usuarios “dunha maneira
amena e dinámica”. Contén xogos para usuarios de 6 a 14 anos que
teñen como finalidade motivar a realización de actividade física
moderada dos pacientes.
Tendo
en conta a situación actual provocada pola pandemia da COVID-19,
Aida Vidal destaca que “a aplicación podería proporcionar unha
rutina personalizada a cada paciente segundo o que indique o persoal
médico, xa que todas as actividades que se inclúen foron deseñadas
para realizarse en interiores e espazos reducidos, polo que se
adaptarían con facilidade ás situacións de confinamento vividas
nestes meses”.
A
enxeñeira en Informática sinala que a aplicación complementouse
tamén cun sistema que permite a recolección e visualización dos
datos de uso dos pacientes, proporcionando unha forma dinámica e
indirecta de recoller datos sobre a súa mobilidade e estado de
ánimo.
Actualmente,
Aida Vidal realiza os estudos de doutoramento no Programa de
Doutoramento de Tecnoloxías da Información e Comunicacións en
Redes Móbiles da UDC.
Ademais,
foron finalistas do premio Efraím Lema Vidal co proxecto Sistema
multiplataforma de xestión de peticións e colas de reprodución
para locais de ocio, e Jorge López Seijas coa contribución
Sistema de control de acceso e ubicación de operarios en función
da equipación requirida dentro da industria. Os tres enxeñeiros
en Informática beneficiaranse dun ano de colexiación gratuíta.