O CPEIG convértese no primeiro colexio profesional integrado en AQPE

O Colexio Profesional de Enxeñaría en Informática de Galicia (CPEIG) converteuse este mes en entidade membro da Fundación Privada Catalá Axencia de Cualificación dos Profesionais da Enxeñaría (AQPE), converténdose no primeiro colexio profesional en incorporarse á AQPE.
A AQPE ten como finalidade “a calidade da enxeñería, promovendo, proxectando e velando pola excelencia no exercicio e boas prácticas dos seus profesionais”. O pasado 10 de decembro o padroado da fundación decidiu a admisión do CPEIG como entidade membro, pasando o presidente do Colexio, Fernando Suárez, a exercer funcións de vogal da Fundación integrada polos colexios e as asociacións profesionais que conforman AQPE.
O certificado PEQ (Profesional Engineer) que expide AQPE avala o nivel competencial obtido polo profesional da enxeñaría que se somete ao procedemento de avaliación aplicado polo seu colexio profesional e sancionado polo Comité de Cualificación Profesional da AQPE.
A través do certificado, acredítanse as competencias que teñen os profesionais nos ámbitos onde as exercitaron e, deste xeito, ofréceselle información rigorosa, precisa e ecuánime ás empresas e á sociedade sobre a experiencia profesional dos enxeñeiros. Ademais, o certificado facilita a mobilidade internacional dos profesionais da enxeñaría, principalmente a nivel europeo, desenvolvendo a converxencia internacional dos sistemas de certificación empregados, así como o seu recoñecemento mutuo.