O CNTG acolleu a primeira xornada sobre tecnoloxía social do país

O Centro de Novas Tecnoloxías de Galicia (CNTG) acolleu o pasado xoves a que foi a primeira xornada organizada no noso país con vistas a valorar a utilidade das TIC para mellorar a vida das persoas, sobre todo no tocante á súa saúde e benestar.
Foi organizada polo Club de Amigos de la Tecnología Social, unha entidade que comezou a funcionar o pasado mes de febreiro en Madrid, e que pretende levar a cabo unha serie de encontros por todo o Estado nos que se fale e debata sobre aspectos relativos á tecnoloxía social, da man de profesionais de distintos sectores que teñen moito que aportar.
A xornada, que na nosa Comunidade estivo apoiada por tódalas asociacións representativas do sector TIC galego e pola AMTEGA, serviu, entre outras cousas, para poñer en valor a importancia que adquiriron as novas tecnoloxías nas nosas vidas, así como para presentar unha serie de produtos e servizos moi útiles para asegurarlle unha boa calidade de vida á cidadanía.
Algunhas solucións presentadas durante a sesión foron os SmartKits de Elea Soluciones, que fan posible a distribución masiva de tecnoloxía sen fíos (e de baixo consumo) de sistemas de acceso á vivenda, acceso a portais, aviso de chamada, aviso perante caídas... que se instalan de xeito doado e que non precisan ningún tipo de alimentación para funcionar.
Tamén se presentou a Inclusite, unha aplicación que lle permite o acceso a Internet ás persoas que sofren algunha discapacidade, sen que sexa modificado o contido nin a forma da web.
A plataforma iDigitalBox no Fogar, presentada por InfoJC, que ofrece unha serie de servizos básicos de ocio implantados e integrados na vivenda, como TV, Radio, noticias, RSS, envío de SMS... e que nunha segunda fase se completaron con servizos de alto valor engadido que melloran a usabilidade, como son ordes por voz, lectura automática de noticias, teclados personalizados... un servizo, en definitiva, que mellora a integración das TIC no fogar e interacción das persoas no domicilio.
Pola súa banda, a presidenta da Asociación de Mulleres e Familias do Rural (AMFAR Galicia) explicou de primeira man o proxecto eStar Bien, que consiste nunha plataforma accesible dende calquera dispositivo (ordenador, televisión ou móbil) que ofrece servizos asistenciais, laborais e de ocio.
Tamén asistiu a firma Interacción, que expuxo os beneficios dos videoxogos para a formación e o ocio; os responsables de Imaxdi, que achegaron os seus servizos e dispositivos para doentes crónicos de corazón e os de Mega Sistemas, que presentaron o seu servizo de comunicación de incidentes críticos no Servizo de Anestesia.
Segundo afirman os responsables da xornada, tódalas exposicións, polo seu carácter práctico, “foron moi ben recibidas polas persoas asistentes”, “que fixeron numerosas preguntas e intercambiaron contactos para realizar proxectos en colaboración ou solicitar máis información”, engaden.
“Por enriba de todo”, din, “quedou claro que a tecnoloxía social, as tecnoloxías para a saúde e o benestar, van dirixidas a todas e cada unha das persoas independentemente da súa saúde”, como din que poñía unha diapositiva proxectada, “están dirixidas aos 47 millóns de españois”.