O CLAG celebra un foro sobre o estándar de televisión híbrida HbbTV
mércores, 20 de marzo do 2013
O Clúster Audiovisual
Galego (CLAG) celebra hoxe en Santiago un encontro profesional
dirixido a avaliar o futuro dos contidos nun escenario vindeiro de
cidades intelixentes e conectadas con fogares igualmente intelixentes
e conectadas. Máis polo miúdo, a xuntanza servirá para avaliar as
posibilidades e oportunidades que fornecería o
estándar HbbTV, unha metodoloxía-tecnoloxía de raizame
paneuropea que se dirixe á creación dunha televisión híbrida que
integre emisións de TV con servizos de banda larga (TV+Web). O
encontro en cuestión, que comeza ás 16.30 no Hotel Araguaney de
Santiago, é a nova entrega dos foros estratéxicos do CLAG, a
desenvolver baixo o seguinte epígrafe: O escenario dixital:
Tendencias no mercado da Televisión conectada baseada no estándar
HbbTV.
Entre os principais obxectivos deste encontro está
presentar os cambios nas tendencias de consumo audiovisual asociados
ao incremento da penetración da TV conectada e o seu impacto no
desenvolvemento de novos produtos e modelos de negocio das empresas
da cadea de valor do sector audiovisual. Durante este foro
reflexionarase sobre os retos e oportunidades relacionados co
desenvolvemento dun segmento de negocio cuxa facturación se prevé
ascenderá a 2,5 millóns de euros en 2015. Ademais poderanse coñecer
as estratexias e os modelos de negocio de broadcasters á
hora de aportar valor á súa oferta de servizos para aproveitar a
oportunidade que representa o mercado da TV conectada. O
vicepresidente da Asociación Española de Empresas de Televisión
Interactiva (AEDETI), Tomás Cid Ballarín, será o encargado de
moderar a mesa redonda, e ofrecerá un relatorio sobre a situación
actual da TV conectada en España e os seus retos e oportunidades no
horizonte do 2020. Asemade, profesionais como Francisco Asensi,
director de Desenvolvemento de Negocio de RTVE.ES, e Esther Medina,
xefa da Área de Innovación e Novas Canles da CRTVG, disertarán
sobre as estratexias de medios interactivos en broadcasters.
Darío Janeiro, director de Contidos e Publicidade Multiplataforma en
CINFO, abordará, a través da experiencia da súa empresa, as
oportunidades de negocio para PEMEs audiovisuais.