O CITIC e o CDTI presentan ante as empresas a nova convocatoria Innterconecta
mércores, 13 de maio do 2015
O vindeiro martes 26 de
maio, o Centro de Investigación en Tecnoloxías da Información e as
Comunicacións (CITIC) organiza na súa sede do Campus de Elviña
(Coruña), conxuntamente co Centro para o Desenvolvemento Tecnolóxico
Industrial (CDTI), a Xornada
CDTI: nova convocatoria 2015 Programa Innterconecta. O
obxectivo do encontro é presentar as características e
oportunidades da nova convocatoria 2015 do dito programa, no marco de
financiamento en materia de I+D para o período 2015-2020.
O prazo de inscrición
estará aberto até o vindeiro venres 15 de maio, e as empresas
interesadas poderán rexistrarse mediante formulario electrónico.
Se, ademais, desexan manter reunións bilaterais de 45 minutos con
representantes do CDTI, deberán enviar unha ficha de proxecto por
correo electrónico ao enderezo proyectos@citic-research.org.
Segundo informan fontes
do centro impulsado pola Universidade da Coruña, o encontro do 26 de
maio “volve pór de manifesto a aposta polo fomento da
transferencia tecnolóxica cara ao sector empresarial impulsada e
desenvolvida desde o CITIC, ao enmarcarse dentro dunha serie de
actividades que o Centro organiza ao longo do ano para tal fin”. A
xornada dará comezo ás 9.30 co rexistro de asistentes para logo dar
cabida á presentación á convocatoria 2015 do Programa
Innterconecta a cargo de Manuel González Penedo, coordinador do
CITIC, e Luis Maeso, responsábel do Departamento de Enerxía e
Transporte (Dirección de Promoción e Coordinación) do CDTI. Ao
longo da mañá haberá reunións bilaterais entre os representantes
das empresas participantes na xuntanza e os responsábeis do CDTI.