O CITIC da UDC acolle a terceira edición do International Workshop on 5G Communications
mércores, 17 de xullo do 2019
O
Centro de Investigación TIC (CITIC) da Universidade da Coruña vén
de converterse na capital mundial da tecnoloxía 5G coa
celebración da terceira edición do International Workshop on 5G
communications (IW5GC2019), que comezou este martes 16 de xullo e
remata mañá, día 18. Organizado xunto coa Universidade de Tongil
(China), recibiu a visita de máis de 30 asistentes internacionais.
Este
evento, que reúne a persoas graduadas de diferentes universidades
españolas e chinesas, exerce, en palabras do CITIC, de “punto de
encontro e de intercambios académicos, para ofrecer unha descrición
xeral dos avances da investigación actual no modelado de canles para
comunicacións de quinta xeración”. Ao fío do devandito e poñendo
o foco na importancia de intercambiar coñecemento arredor de
tecnoloxías avanzadas e relevantes (un dos grandes obxectivos do
CITIC), o centro coruñés salienta que “a celebración deste
evento de referencia internacional é para nós un orgullo; un xeito
de compartir coñecemento, experiencias e innovación no campo da
tecnoloxía 5G”, afirma o director do CITIC, Manuel F. González
Penedo.
Cuestións
como sistemas de alta frecuencia, comunicacións masivas MIMO,
esquemas dúplex completos, comunicacións de vehículos, escenarios
de terra e aire e comunicacións ópticas, codificación 5G,
optimización da rede, melloras á rede de acceso de radio ou a
optimización do control de recursos de radio, entre outras, foron
abordadas nesta xornada, que rematará mañá co peche das sesións
de workshop e a entrega de diplomas no paraninfo da reitoría
da UDC. Este acto de peche contará coa presencia do reitor da UDC,
Julio Abalde, o director do CITIC, Manuel Penedo, e o coordinador do
grupo de Tecnoloxía Electrónica e Comunicacións da UDC, Luis
Castedo.