O CITIC colaborará co centro de desenvolvemento infantil Pasitos

venres, 15 de novembro do 2019 Redacción

Os pasados días, o director do centro infantil Pasitos, con sede en Oviedo e moi centrado nas formas máis innovadoras da educación e o desenvolvemento das nenas e nenos, visitou a sede do Centro de Investigación TIC da Universidade da Coruña (CITIC), co obxectivo de establecer novos acordos de colaboración entre ambas entidades, con vistas a avanzar na integración de contornas virtuais inmersivas como “novas ferramentas de intervención en nenos con fins terapéuticos”.
O centro de nenez asturiano xa contara coa colaboración do CITIC con anterioridade para crear contidos baseados por computador para traballar coa rapazada. Segundo informa o centro coruñés, con esta nova colaboración están a avaliarse as posibilidades que ofrece a realidade virtual e as contornas de realidade envolvente como elementos estimulantes para captar a atención dos nenos e conseguir traballar aspectos dos seus hábitos e capacidades que lles permitan un maior grao de autonomía e participación social.

PUBLICIDADE