O CITIC aposta pola confluencia entre empresas e investigadores para a súa formación de outono
martes, 18 de novembro do 2014
O CITIC
está a amosar unha importante actividade formativa nesta tempada de
outono. Esta vontade divulgativa do centro tecnolóxico coruñés
caracterízase, en palabras dos seus responsábeis, por ser unha
formación especializada na que conflúen empresas e investigadores.
Así, o pasado 16 de outubro comezaba no centro o Curso Avanzado de
Programación en Dispositivos Móbiles con Android, unha actividade
que pretende capacitar aos asistentes no desenvolvemento de
aplicacións profesionais avanzadas para dispositivos móbiles
Android, “cun enfoque eminentemente práctico”.
Os participantes desta
actividade, engade o CITIC, teñen a oportunidade de afrontar o
deseño dunha aplicación desde que nace como prototipo até a súa
publicación no mercado ou a súa distribución ad hoc, entre
outras moitas cousas. A persoa responsábel de impartir este curso é
Pablo Formoso Estrada, licenciado en Enxeñaría Informática pola
Universidade Europea de Madrid e socio fundador de Softwhisper,
empresa adicada ao desenvolvemento de aplicacións para dispositivos
móbiles, desde o ano 2010.
Outra das contribucións
formativas do CITIC é o Curso de Dirección e Xestión de Proxectos
TI baixo Metodoloxía PMI con Microsoft Project, que deu comezo o
pasado 26 de setembro. O principal obxectivo é que os asistentes
coñezan os conceptos da dirección e xestión de proxectos TI, os
principais procedementos e o vocabulario estándar do PMI Project
Management Institute. Esta actividade está organizada por Vitae
Consultores en colaboración co CITIC, impartida polo profesor Carlos
González Jardón, enxeñeiro técnico en Informática de Xestión
pola Universidade de Vigo e executive MBA pola Universidade
Pontificia de Comillas quen traballa arestora en Tecnocom como
coordinador de Proxectos de Banca e colaborando coa Oficina de
Proxectos de NCG.