O CESGA pon en xogo a súa tecnoloxía para mellorar a predición de correntes mariñas
xoves, 23 de febreiro do 2012
- Captura da páxina web do programa MyOcean
O Centro
de Supercomputación de Galicia está a achegar a súa
tecnoloxía de cálculo avanzado para mellorar o servizo de
prognósticos medioambientais coordinados polo organismo público
Portos do Estado nun proxecto interestatal de investigación. A
achega do CESGA materialízase a través do sistema de predición de
correntes mariñas, MyOcean,
un programa europeo que xestiona a dita entidade para as costas de
España, Portugal, Francia e Irlanda. Os obxectivos de MyOcean, amais
do seu labor xenérico de estudo e anticipación sobre as
características e condicións do mar, pasan por subministrarlles o
mellor apoio posíbel aos servizos de salvamento marítimo e á loita
contra a contaminación accidental.
A concorrencia do CESGA en MyOcean
responde, precisamente, á necesidade de elaborar as predicións
meteorolóxicas máis exactas posíbeis, non só referidas aos ventos
ou á ondaxe mariña senón tamén a un elemento concreto de suma
importancia para a navegación: o comportamento das correntes.
O proxecto europeo MyOcean diríxese
precisamente cara a este punto: cara a facilitar a información
necesaria que, no caso dunha vertedura ou dun naufraxio, fagan máis
doados e precisos os traballos de resolución. O potencial da
ferramenta é grande, sinalan os seus responsábeis, xa que no futuro
mesmo permitiría que as navieiras tiveran a posibilidade real de
aforrar combustíbel, ao contar con datos de primeira man sobre cales
son as rutas máis doadas de percorrer nun intre e nunha viaxe
determinada. Amais do comportamento das correntes, MyOcean tamén
achega información sobre a temperatura e a salinidade das augas. Os
datos extráense de satélites, boias e outros sistemas de obtención
directa de datos como mareógrafos ou radares. “Para desenvolver
unha predición de correntes mariñas axeitada a partir deses datos”,
informa o CESGA, “a clave é conseguir uns modelos de
circulación mariña con maior resolución, e isto esixe contar cunha
enorme capacidade de cálculo para que sexa posible realizala en
pouco tempo”. Isto acádase grazas aos sistemas de
supercomputación do CESGA e o seu equipo humano. Cómpre lembrar que
o centro galego, emprazado no Campus Sur de Santiago, é a sede do
sistema de predición desde o punto de vista numérico, mentres que a
coordinación das predicións lévase a cabo a través de Portos do
Estado e desde o instituto francés Mercator-Ocean. Os datos son
accesíbeis tanto para empresas privadas como para institucións
públicas de investigación, e difúndense tanto en forma numérica
como en feitura de mapas a través de http://myodata.puertos.es.
Evolución
Segundo informa o CESGA, en abril
poñerase en marcha MyOcean2, que consolidará o modelo de alta
resolución –ata dous quilómetros- e facilitará predicións máis
precisas. “E para realizar as de carácter local”,
engádese, “válidas por exemplo para as rías galegas -con ata
50 metros de resolución-, o sistema actual xa permite ’’aniñar’’ no
modelo global distintos modelos locais de maior precisión, algo do
que se beneficia MeteoGalicia, o servizo de predición meteorolóxica
da Consellería de Medio
Ambiente da Xunta de Galicia”. En
MyOcean participan 61 institucións de 29 países. A través do
proxecto, recompílanse e distribúense datos de 2.400 estacións:
100 mareógrafos, 1.900 boias de deriva e 400 boias ancoradas. Para a
zona coordinada por Portos do Estado empréganse informacións
procedentes de 320 estacións.