O CEMMA conmemora os seus 10.000 followers no Facebook
mércores, 21 de agosto do 2019
A Coordinadora para o Estudo dos Mamíferos
Mariños (CEMMA) está estes días de celebración: unha
conmemoración tecnolóxico-dixital. Máis
en detalle, está a festexar a consecución de 10.000 seareiras e
seareiros no Facebook de seu, onde a organización galega informa
polo miúdo das súas actividades, da súa investigación oceánica e
do seu traballo a prol dos animais que varan ou están en risco de
encallar no noso litoral (o CEMMA e a súa Rede de Varamentos é,
xunto co 112 e os grupos locais de Protección Civil, o principal
órgano ao que acudir no caso de que vexamos un animal mariño en
apuros). Agora, en palabras do CEMMA e da súa comunidade de
Facebook, toca seguir traballando e toca acadar outra cifra
semellante de incorporacións.
A coordinadora, con sede principal en Nigrán, é
unha ONG ambiental galega constituída en 1992. Os seus principais
obxectivos son “o estudo e a investigación dos mamíferos e
tartarugas mariñas, fomentando medidas que impliquen a súa
conservación, e a difusión dos mesmos a través de distintas
publicacións e accións de educación ambiental”. Este labor de
difusión lévase a cabo sobre todo a través da devandita rede
social e a través da web da coordinadora, www.cemma.org.