O CDTIC amosa as claves para sermos punteiros na creación e venda de produtos en software libre
luns, 19 de maio do 2014
O
Centro Demostrador TIC acollerá o día 23 de maio unha
importante cita para todos aqueles dos nosos profesionais
responsábeis de iniciativas consolidadas no deseño e achegamento de
programas abertos, ou iniciativas en vieiros de comezar a súa
andaina. En definitiva, será unha oportunidade para acadarmos os
recursos para obter as maiores posibilidades de éxito en actividade
empresarial arredor do open source.
O seminario Creación,
desenvolvemento e comercialización de produtos TIC en software libre impartirase
en horario de
12.00 a 14.00 horas.
Trátase do segundo curso
das catro actividades de formación específica para persoal
directivo das empresas TIC galegas, que se están a impartir no
devandito centro todos os xoves e venres desde o pasado 8 de maio e
ata o 6 de xuño. A asistencia é gratuíta e cómpre
inscribírmonos na web do CDTIC, xa que as prazas son limitadas.
No programa desta
actividade formativa prevese mostrar como incorporar o código aberto
no produto e como licencialo, e diversos aspectos relacionados co
software libre, como quen o emprega para crear produtos TIC ou os
modelos de negocio. O enxeñeiro José María Casanova Crespo será o
encargado de impartir este seminario, que segundo sinala AMTEGA
(responsábel do CDTIC) ten como obxectivos “dar a coñecer as
vantaxes e obrigas para poder integrar compoñentes de software libre
no desenvolvemento do produto; comprender as dinámicas e o modelo de
negocio baseado na colaboración no universo do open source; e
identificar boas prácticas para xestionar a propiedade intelectual
implicada na construción dun produto TIC”.
A xornada está
especialmente dirixida a persoal directivo, responsábeis ou técnicos
de empresas do sector TIC.