O CDT inaugurado en Santiago contribuirá á creación dunha imaxe de marca TIC 100% galega
luns, 27 de xuño do 2011
Amais de
consolidarse como
escenario para a visualización do noso software libre empresarial, o Centro
Demostrador TIC de Galicia (inaugurado este luns sobre o alicerce do Centro de
Novas Tecnoloxías de Galicia de Santiago, o CNTG) será un apoio de primeira
liña para a creación dunha imaxe propia de marca con potencial para contribuír
ao espallamento das nosas empresas do sector tecnolóxico-dixital alén do noso ámbito
xeográfico. Así o fixo saber
perante os medios o presidente da Xunta, Alberto Núñez Feijoo, quen enumerou
algunhas das principais características deste espazo para a promoción dos nosos
produtos e para a colaboración entre empresas, un espazo que xa conta con 52
firmas e un instituto tecnolóxico, todas elas dispostas xa a amosar polo miúdo
200 produtos e 27 servizos TIC, abranguendo vantaxes e beneficios para tódolos
sectores.
Por certo que o
presidente da Xunta, que acudiu á apertura do Centro xunto con Beatriz Mato e
Mar Pereira, aproveitou a ocasión para falar dun vindeiro convenio de
colaboración de importancia estratéxica para a nosa terra: o que formalizará en
breve o Goberno galego co Cluster TIC para definir de xeito conxunto “o modelo de financiamento que máis partido
saque do potencial que ten este sector na comunidade autónoma”. A previsión,
engadiu, é que esta nova estratexia de financiamento estea operativa en 2012, “respondendo de xeito máis eficaz ás
necesidades que ten e terá o sector”.
Polo que respecta
á intervención de Beatriz Mato, máxima responsable da Consellería de Traballo
(da que depende o CNTG), dicir que fixo fincapé no carácter do Centro
Demostrador como iniciativa oportuna, “complemento
perfecto para as actividades formativas e técnicas, dirixidas aos profesionais
do sector TIC galego, que xa se veñen desenvolvendo no Centro de Novas
Tecnoloxías de Galicia”, dixo. A experiencia, dixo, non lle fai faltar ao
Centro Demostrador, e máis se temos en conta que o CNTG, a súa sede, deu
acubillo no curso 2010/2011 a máis de 50 actividades de formación, “sen incluír xornadas e seminarios técnicos”,
nos que participaron 775 profesionais do sector.
No que se refire á participación de Mar Pereira, secretaria xeral de
Modernización, na apertura oficial deste espazo de investigación e promoción
informática, dicir que quixo salientar o gran potencial do CDT para
facilitarlles ás empresas do sector “os
medios para achegar a súa oferta de produtos ás empresas doutros eidos
produtivos, converténdose nun punto de encontro entre a oferta TIC e a demanda
tecnolóxica do tecido empresarial galego”.
E engadiu, facendo referencia á natureza expansiva
das TIC cara outros ámbitos produtivos, mellorándoos: “As empresas TIC poderán desenvolver coa axuda
deste Centro solucións innovadoras adaptadas ás necesidades de mercado de empresas doutras áreas como a
automoción, a construción o naval, a enerxía,
o téxtil …, que coñecerán os produtos TIC máis axeitados para optimizar
os seus negocios e terán a oportunidade de trasladarlles demandas concretas ás
empresas do ámbito tecnolóxico”.
Máis servizos
Segundo informa a Xunta, o Centro
Demostrador porá a disposición das empresas interesadas o Mapa de Solucións
Tecnolóxicas de Galicia MapaTIC.gal, un directorio en liña cos provedores,
produtos e servizos TIC existentes na Comunidade. Asemade, para axudar ao
aliñamento da oferta de produtos e servizos TIC e a demanda tecnolóxica doutros
sectores empresariais, o Centro organizará xornadas e demostracións de produtos
TIC aos diferentes sectores produtivos.
A orixe e o orzamento
O Centro, lembrou Mar Pereira, ten a súa raizame nun acordo de colaboración entre a Xunta e o Ministerio
de Industria, Turismo e Comercio, a través de Red.es, contando cun investimento máximo conxunto de 2.720.875,71
euros ata decembro de 2013, dos que máis de 2 millóns foron achegados pola
devandita entidade público-empresarial, grazas á contribución do Programa
Operativo de I+D+i por e para o beneficio das Empresas, fondo tecnolóxico
2007-2013 de FEDER, e 600.000 euros pola Xunta.
Factoría de Emprendedores TIC de Galicia
Núñez Feijoo
adiantou no transcurso da apertura do Centro de Conxo que neste mesmo ano 2011 porase
en marcha a Factoría de Emprendedores TIC de Galicia, para apoiar a creación de
empresas a partir do potencial e das capacidades tecnolóxicas dos grupos de
investigación e dos emprendedores.
Trátase dun
proxecto, explicou, que persegue “multiplicar
de forma considerable o número de empresas de base tecnolóxica que nacen e se
manteñen dentro da nosa comunidade, e facilitar o camiño ao emprendedor,
apoiándoo e asesorándoo permanentemente”. E engadiu: “Queremos apoialos, poñer en valor o seu coñecemento e levar todas as
ideas viables ao mercado para convertelas en riqueza”.
Declaracións do presidente da Xunta sobre o convenio que asinará co Cluster TIC Galicia