O CCG mostra as posibilidades do virtual para reconstruír a arquitectura que xa non é
martes, 10 de xullo do 2018
O Consello da Cultura
Galega (CCG) vai analizar nunhas novas xornadas as
posibilidades das novas tecnoloxías para refacer o pasado: para
levarnos de volta, con realidades recreadas e experiencias vívidas,
a espazos que apenas existen ou que xa non existen en absoluto. As
xornadas Arquitecturas esvaecidas: Da iconografía histórica á
reconstrución virtual en Galicia comezan este 10 de xullo e
nelas mostrarase o potencial das distintas fontes gráficas de
carácter histórico para estudar o patrimonio arquitectónico e
urbano que desapareceu ou para recuperalo. O estudo destas fontes
gráficas, unido á súa confluencia coas reconstrucións virtuais
máis avanzadas, fan posíbel a milagre de re-vivir de verdade o que
xa pasou.
Jesús A. Sánchez
García, Julio Vázquez Castro e Alfredo Vigo Trasancos son os
coordinadores e membros do grupo de investigación de Historia da
Arte, da Arquitectura e do Urbanismo (HAAYDU) da USC que darán a
coñecer en primicia algúns exemplos galegos reconstruídos que,
segundo informa o CCG, “fan revivir varios monumentos perdidos ou
que chegaron a nós moi seriamente transformados”.
Rosario Álvarez,
presidenta do Consello da Cultura Galega inaugurará as xornadas,
organizadas pola Sección de Patrimonio e Bens Culturais (CCG).
As sesións, amais dos
devanditos obxectivos, buscan dar visibilidade a arquivos e centros
de investigación que atesouran legados iconográficos de gran valor.
Con esta finalidade, contarase coa presenza de persoas expertas que
achegarán o traballo que se está a desenvolver en entidades galegas
para o coñecemento e divulgación dos fondos iconográficos para a
historia da arquitectura e da cidade en Galicia. É o caso de Mª de
la O Suárez Rodríguez, arquiveira municipal da Coruña; Cristina
Echave Durán, conservadora do Arquivo Gráfico do Museo de
Pontevedra, e Guillermo Escrigas (CGAI).
Pola súa banda,
Francisco Javier Rodríguez Barberán, profesor titular da Escuela
Técnica Superior de Arquitectura da Universidade de Sevilla falará
sobre O mundo de onte. Os debuxos de Richard Ford (1830-1833) como
rexistro de ausencias e Helena Pérez Gallardo, profesora do
Departamento de Arte Contemporánea, Universidade Complutense de
Madrid realizará un relatorio sobre a fotografía histórica e os
monumentos españois desaparecidos.
Logo destas presentacións
xerais achegaranse distintos traballos realizados por membros do
grupo de investigación de Historia da Arte, da Arquitectura e do
Urbanismo (HAAYDU) da Universidade de Santiago de Compostela. Así,
Paula Pita Galán falará sobre Galicia nos fondos do Institut
d´Estudis Fotogràfics de Catalunya; Jesús A. Sánchez García
presentará o proxecto Memoria, textos e imaxes e, finalmente,
Julio Vázquez Castro e Alfredo Vigo Trasancos darán conta de
monumentos recuperados: as Torres de Altamira e da Real Fábrica de
Biscoito de Neda á Casa do Capitán Xeral de Ferrol,
respectivamente.
Pola súa banda, Carlos
Paz de Lorenzo, deseñador gráfico de Noma Estudio, quen levou a
cabo estes traballos dende o punto de vista técnico, explicará as
posibilidades da iconografía antiga e reconstrucións 3D.
O evento será
retransmitido en streaming dende a web institucional
www.consellodacultura.gal.