O Álbum de Galicia incorpora a Ramiro Vidal, figura clave da colectividade galega en Lisboa
mércores, 7 de abril do 2021
O
Álbum de Galicia, a gran base de datos do Consello da Cultura Galega
sobre a historia da nosa terra a través dos nomes propios dalgúns
dos seus grandes protagonistas, vén de recibir co inicio de abril
unha nova incorporación. Trátase
da biografía de Ramiro Vidal, figura destacada para entender o
xermolo da colectividade galega en Lisboa.
Ramiro
Vidal Carrera (Taboexa, As Neves, 1887 – Vilasobroso, Mondariz,
1967) é a última incorporación ao Álbum de Galicia do Consello da
Cultura Galega (CCG). Na súa entrada biográfica achega a súa
evolución como empresario, pero tamén a súa faceta de político e
colaborador en diferentes xornais. A entrada foi elaborada por Miguel
Regojo Fernández, bisneto de Remiro Vidal, que cedeu material ao
Arquivo da Emigración Galega (AEG).
Álbum
de Galicia
En
xaneiro de 2020 o CCG presentou o Álbum de Galicia, unha colección
dixital de biografías de persoas que destacaron en diversos ámbitos:
desde a sociedade, a ciencia, a cultura ou a empresa. A idea é “dar
visibilidade e perspectiva de conxunto ás numerosas mulleres e
homes, xa finados, que contribuíron de maneira significativa á
sociedade galega ao longo da súa Historia. En moitos casos, seguen a
ser grandes descoñecidos para o público de todas as idades, de
dentro e de fóra do país”, en palabras do CCG.
As
biografías do Álbum de Galicia están enriquecidas con material
documental, referencias bibliográficas e contidos multimedia que
permiten coñecer a obra das persoas divulgadas, pero tamén a
produción intelectual existente sobre elas.
Ademais,
permite explorar a presenza das persoas biografadas nos fondos
documentais dixitalizados do Consello da Cultura Galega.
O
Álbum de Galicia é o resultado da unificación das coleccións
biográficas temáticas do CCG, que desde o ano 2005 teñen publicado
álbums ao redor da muller, a ciencia ou a emigración, entre outros.