Nova edición do concurso Lingua de Namorar

luns, 3 de febreiro do 2014 Redacción

O secretario xeral de Política Lingüística, Valentín García, e o director xeral de Xuventude e Voluntariado, Ovidio Rodeiro, presentaron hoxe en rolda de prensa certame Lingua de namorar que consiste nun concurso en liña de mensaxes de amor como iniciativa para fomentar o uso do galego entre os mozos e mozas, especialmente en momentos de lecer. Deste xeito buscan dinamizar o uso da lingua galega nas relacións persoais e nas TIC, concretamente na Internet e a mensaxería instantánea.
O responsable de Política Lingüística destacou que “coa posta en marcha da iniciativa se busca tamén aproveitar as oportunidades de promoción do galego e de participación que ofrece a web 2.0 para estimular a interactuación en galego da xente nova”. Xa que “as linguas asociadas á creatividade, á vangarda e ás maneiras de comunicación que posibilitan as TIC son as que collen o tren do futuro”.

Ovidio Rodeiro e Valentín García na rolda de prensa de hoxe

Poderán participar no programa persoas que teñan unha idade comprendida entre os 14 e os 35 anos. Haberá dúas categorías: de 14 a 19; e de 20 a 35. En canto ás mensaxes, deberán estar escritas en galego e poderán redactarse en prosa ou verso. A súa extensión máxima será de 350 carácteres, incluídos os espazos en brancos. Cada participante poderá enviar un máximo de dúas mensaxes ao concurso.
Para poder enviar as mensaxes, será preciso rexistrarse na páxina web do concurso e cubrir o formulario de inscrición. Todas serán publicadas na páxina do concurso e estarán identificadas polo título e máis polo número que se lles asigne. A data límite para enviar as declaracións será o 23 de febreiro.
A partir do 24 de febreiro, e ata o 28, abrirase un período para votar (os usuarios que queiran votar deberán rexistrarse na web). Un xurado elixirá aos gañadores entre as 50 declaracións máis votadas en cada categoría. As mensaxes escollidas (que se farán públicas o 10 de marzo na páxina web) serán as únicas que se identifiquen co nome e apelidos dos autores e autoras.
Establécense tres premios por categoría. Para aqueles mozos e mozas de entre 14 e 19 anos, serán os seguintes: unha Playstation 4 para o primeiro; unha mesa de mesturas de DJ para o segundo; e un reprodutor de MP3 acuático. Pola súa banda, na segunda categoría (de 20 a 35 anos), os gañadores poderán conseguir: unha cámara Canon réflex dixital para o primeiro clasificado; un navegador GPS de montañismo para o segundo; e un reprodutor de MP3 acuático para o terceiro. Nesta última categoría, todos os premios irán acompañados a maiores por unha actividade de aventura para dúas persoas.

PUBLICIDADE