Nova edición de Galicia Exporta Dixital con 4,4 millóns de euros de orzamento

A Xunta lanzou unha nova convocatoria do programa Galicia Exporta Dixital, que abrirá o luns o prazo de presentación de solicitudes na procura de facilitar e promover a internacionalización do tecido produtivo galego. A nova edición conta cun orzamento de 4,4M€ co obxectivo de apoiar a expansión internacional de empresas (especialmente pemes) e autónomos, a través de novas canles de comercialización partindo de ferramentas dixitais innovadoras.
As axudas son de concorrencia non competitiva e cobren ata un máximo do 80% dos gastos e investimentos necesarios para desenvolver e implementar o plan de internacionalización dixital. Pódese presentar unha única solicitude por empresa cun gasto subvencionábel de entre 18.000 e 100.000 euros. No caso de empresas do sector da produción agraria e da pesca, o gasto mínimo ao que dar cobertura pode ser igual ou superior a 14.000€, cun máximo de 37.500€ no caso de empresas do sector da pesca e de 25.000€ para as de produción agraria.
Segundo fai saber a Xunta, estes apoios permitirán aos beneficiarios acometer actuacións de consultoría como diagnóstico de potencial exportador dixital, plans de internacionalización dixital multicanle, plans de mercados electrónicos concretos ou cubrir gastos de asesoría xurídica e legal para a internacionalización dixital. Tamén adquirir software relacionado con solucións tecnolóxicas para crear, xestionar e conectar catálogos dixitais internacionais, programación a medida, solucións de analítica ou intelixencia automatizada así como de mercadotecnia inbound ou crear e adaptar tendas online.