Nomean a Mar Pereira como directora da Axencia para a Modernización Tecnolóxica de Galicia
venres, 16 de marzo do 2012
- Pereira durante a presentación aos medios das instalacións do futuro CPDI da Xunta na Cidade da Cultura
O
Consello da Xunta nomeou esta mañá a Mar Pereira Álvarez como directora da Axencia
para a Modernización Tecnolóxica de Galicia (AMTEGA), organismo que unificará
baixo unha mesma dirección todos os recursos materiais e orzamentarios
implicados nas políticas tecnolóxicas da Xunta e permitirá un modelo de xestión
das TIC integrado para prestar mellores servizos, máis eficaces e con menor
custe, evitando duplicidades administrativas e establecendo unha formulación de
traballo por obxectivos.
O novo organismo pretende a posta en marcha e a consolidación de 17 proxectos tecnolóxicos para conseguir unha comunidade vertebrada dixitalmente, unha administración eficiente, e a dinamización económica de Galicia co sector TIC como elemento tractor.
María del Mar Pereira Álvarez
Mar Pereira é licenciada en Física Electrónica pola Facultade de Santiago de
Compostela e desde abril de 2009 ocupaba o posto de secretaria xeral de
Modernización e Innovación Tecnolóxica da Xunta de Galicia, departamento cuxas
funcións asume a AMTEGA.
Mar Pereira pertence ao corpo de
técnicos superiores de sistemas e tecnoloxías da información do Servizo Galego
de Saúde. Entre o ano 2005 e o 2009 foi subdirectora xeral de Sistemas e
Tecnoloxías da Información da Consellería de Sanidade de Galicia. Anteriormente,
ocupou o posto de directora de Organización e Sistemas do Complexo Hospitalario
Universitario de Santiago, así como outros postos de responsabilidade na Administración
sanitaria. Previamente, a súa experiencia profesional desenvolveuse no ámbito
privado, en empresas relacionadas cos sistemas e as tecnoloxías da información.
Mar Pereira é patroa da Fundación para
a Calidade e Desenvolvemento Tecnolóxico de Galicia, así como do Centro de
Supercomputación de Galicia (CESGA), presidenta do Consello de Administración
de Retegal (Redes de Telecomunicacións de Galicia), e vicepresidenta do
Consello Asesor de Telecomunicacións e Audiovisual de Galicia. Así mesmo,
preside o Observatorio da Sociedade da Información e Modernización de Galicia.