Nintendo pechou 2014 mellorando as súas vendas

As figuras amiibo conseguiron converterse en todo un éxito de vendas

Nintendo está a facer balance do ano 2014, e aínda que a compañía nipoa non parece estar a pasar polos seus mellores tempos, ten motivos para a esperanza, xa que conseguiu mellorar máis dun 29% das vendas de hardware e dun 75% as vendas de software con respecto a 2013.
A Nintendo 3DS conseguiu unhas boas vendas no mes de decembro, acompañada por unhas impresionantes vendas de xogos da propia Nintendo, como Super Smash Bros. e Pokémon Omega Ruby e Pokémon Alpha Sapphire, superando os 2 millóns de unidades o primeiro e os 2,6 millóns de copias combinadas os dous últimos (nas súas primeiras 6 semanas á venda). Temos así que a saúda da 3DS é moi boa, con 16 xogos que superaron as 250.000 unidades durante 2014, 8 xogos que pasaron das 500.000 e 3 que conseguiron superar o millón.
A Wii U non ten tanta sorte, e aínda que os seus resultados foron bastante modestos, os usuarios desta consolas parecen ter bastante claro que a adquiren para facerse cos títulos exclusivos desenvolvidos por Nintendo, de xeito que Mario Kart 8 e Super Smash Bros. conseguiron superar 1,7 e 1,3 millóns de unidades vendidas en 2014, aínda que hai un detalle que fai moi interesante o negocio ao redor da Wii U, como é o feito de que as figuras interactivas amiibo, que se puxeron á venda a finais de ano foron un éxito moi claro, chegando case a dobrar as vendas de Super Smash Bros. para Wii U, ou sexa, que os usuarios que compraron o xogo non se conformaron con facerse cunha soa figura. Amais, as novas New Nintendo 3DS e New Nintendo 3DS XL tamén integrarán NFC para poder funcionar con estas figuras, o que vai incrementar considerablemente o seu uso, e poden converterse nunha división moi atractiva, xa que estes pequenos produtos véndense a un prezo individual duns 12,95 euros, de xeito que os beneficios que achegan son bastante elevados. Curiosamente Nintendo deixou de producir as figuras menos populares, creando o efecto perverso de que son case imposibles de atopar en tendas tradicionais e nas tendas en liña teñen prezos moi superiores ao recomendado (dando a impresión de que os amiibo poden chegar a converterse en auténticos obxectos de colección).