Neil Young recorre ao micromecenado para facer realidade o seu reprodutor musical
luns, 10 de marzo do 2014
Para “restaurar a alma da música” Neil Young leva uns meses
promovendo PonoMusic, unha iniciativa que busca achegar música en formato
dixital cunha calidade que respecte as creacións dos autores, mantendo a súa
forza e a súa paixón, para o que están a preparar unha tenda de música en liña
(PonoMusic) e un reprodutor (The
PonoPlayer), que pretende oporse á tendencia actual de escoitar música en
dispositivos multi-función como o smartphone primando a calidade sonora.
O PonoPlayer será un reprodutor portátil, cunha sinxela pantalla LCD táctil,
que integrará tecnoloxía desenvolvida por Ayre (compañía experta en audio
dixital) para permitir que os audiófilos poidan estar o máis preto posible dunha
copia master de estudio, en contraste
cos ficheiros MP3 que tendemos a escoitar actualmente. Este dispositivo terá
unha capacidade interna de 128 Gb (o que permitirá gardar entre 100 e 500
álbums de alta resolución musical) que poderá
adquirirse a partir do mércores a través de Kickstarter a un prezo de 399
dólares.