Naturgy poderá facer telexestión integral das súas redes grazas aos sistemas intelixentes de Microsoft
luns, 11 de novembro do 2019
Microsoft
formalizou un un acordo con UFD, a distribuidora eléctrica do Grupo
Naturgy, co obxectivo de aplicar a tecnoloxía Azure IoT
(referente do ámbitos da Internet das Cousas, a nube, a análise de
Big Data e a Intelixencia Artificial) para facer avanzar a
eléctrica na xestión a distancia das súas infraestruturas. Máis
polo miúdo, o acordo permitiralle supervisar de maneira remota a súa
rede de distribución.
O
primeiro froito da alianza foi sentar os alicerces para o
desenvolvemento dunha solución propia chamada Smart Energy
Platform, con capacidade para facer seguimento das redes de UFD,
cousa que é posíbel grazas á instalación de distintos tipos de
sensores de baixo consumo, materializados a medida das necesidades do
proxecto, que ofrecen, en palabras de Microsoft, “un sistema
avanzado de monitoraxe e aproveitan o potencial da nube para realizar
unha análise en tempo real”.
A adopción deste sistema,
serve a Naturgy para optimizar o mantemento e mellorar o estado da
súa rede de distribución de maneira proactiva, permitíndolle
anticiparse á aparición de incidencias, xerar un aforro de custos e
mellorar o servizo aos clientes.
A
día de hoxe o proxecto atópase na súa fase piloto e ambas empresas
están a traballar de xeito conxunto para desenvolver o hardware
específico que posibilitará a detección dun amplo abano de
incidencias nas estruturas de UFD, que, ademais, pretende ampliar
dita plataforma a outras áreas para mellorar os seus procesos
noutras contornas xeográficas.
Segundo
engade a operadora, “a evolución da plataforma permitiranos
maximizar o rendemento das nosas redes e, de feito, grazas aos datos
proporcionados polos diferentes sensores IoT poderemos coñecer a
carga que soporta cada cable en tempo real, así como a súa
capacidade máxima en cada instante mediante a análise de parámetros
como a temperatura do cable, a ambiental ou o grao de humidade”.
Dese
modo, conclúe UFD, será posíbel “racionalizar o uso da
infraestrutura dun modo máis preciso e realizar unha optimización
dinámica da carga que soporta para alcanzar a máxima eficiencia,
evitando ao mesmo tempo a saturación de puntos concretos da rede
eléctrica”.
As
seguintes fases do proxecto centraranse no desenvolvemento dunha
plataforma baseada na Intelixencia Artificial de Microsoft Azure, que
faga que se poida diferenciar, por exemplo, entre distintos patróns
producidos no tendido eléctrico, para poder así detectar a causa e
a localización exacta de incidencias, reducindo de forma drástica
os tempos de intervención.
Ademais,
nunha fase posterior do proxecto, poderase avanzar na automatización
á hora de xerar partes de intervención con Dynamics 365,
contribuíndo a que o sistema teña recursos para detectar a
incidencia, determinar a solución e pór en marcha todos os procesos
necesarios para alcanzala, acurtando os tempos de intervención.