Narón abre o prazo de inscrición para o seu programa Informática Divertida
xoves, 8 de xuño do 2023
O
Concello de Narón, a través da edil en funcións Novas Tecnoloxías,
Natalia Hermida, anunciou
a apertura do prazo de inscrición no
programa Informática Divertida (INDI) dirixido a menores
empadroados en Narón de entre 8 e 12 anos. A concelleira indicou que
as sesións de INDI desenvolveranse na Aula Cemit de Xuvia do 3 ao 31
de xullo (incluídos, se ben o día 25 non haberá actividade) en
horario de mañá, de 10.00 a 13.30 horas de luns a venres. En total
ofértanse 15 prazas que se cubrirán por rigorosa orde de
inscrición. Os participantes aprenderán a programar con Minecraft,
Star Wars e Frozen e tamén programación de bloques, a
crear blogs para nenas e nenos e a elaborar un cómic dixital.
“Esta
proposta é unha iniciativa formativa centrada no ámbito da robótica
e que convocamos novamente coincidindo co período vacacional para
ofrecer aos máis pequenos ao longo dun mes unha alternativa
educativa, tecnolóxica e creativa para o seu tempo de lecer”,
apuntou a edil naronesa.
Na
zona rural da cidade, ofertouse este mesmo programa aos centros
cívicos sociais das sete parroquias. As persoas interesadas poden
contactar coas diferentes entidades veciñais para inscribirse ou
solicitar información, ofrecéndose dez prazas para cada un deles.
As sesións impartiranse nas mesmas datas e horario que na Aula Cemit
de Xuvia.
As
solicitudes para a Aula poden presentarse ata o 16 de xuño ás 13.00
horas no Rexistro Xeral do Concello, a través da Sede Electrónica
de Narón (onde se pode consultar toda a información deste programa)
ou a través de calquera dos lugares e rexistros establecidos nos
artigos 14.1 e 16.4 da Lei 39/2015, do 1 de outubro, do procedemento
administrativo común das administracións públicas utilizando o
formulario dispoñíbel na sede electrónica. Para obter máis
información sobre o programa INDI pódese chamar ao número de
teléfono 981 337 700 (extensións 1502 ou 1123).