Nace en Vigo unha caixa de suxestións virtual para empresas
mércores, 7 de marzo do 2012
A
Asociación de Jóvenes Empresarios de Galicia (AJE Galicia), comprometida en
axudarlle ás empresas e emprendedores a superar a crise que atravesa o país
dende o 2008, vén de iniciar unha campaña de apoio, difusión e promoción
daqueles proxectos de calado social que sexan desenvolvidos polos seus
asociados, dándolle un protagonismo especial ás iniciativas que promovan as
relacións de comunicación entre empresas e sociedade (principalmente en liña) e
tamén ás vinculadas á formación.
Xa
que logo, un dos proxectos ligados á mellora da comunicación entre empresas e
sociedade e que vai contar co apoio efectivo de AJE Galicia, é a web Elbuzondesugerencias.es,
unha ferramenta que se presenta ás empresas como unha opción de comunicación en
liña eficaz cos seus clientes e traballadores.
A
páxina ten como obxectivo recibir todas aquelas suxestións, consultas ou
dúbidas que poidan xurdir tanto dos propios empregados das empresas como dos
consumidores e clientes, que atoparán aquí un punto de encontro virtual directo
cos responsables da compañía.
Ricardo
Velasco, director da iniciativa, destaca que a principal vantaxe desta web
fronte a outras xa existentes na Rede radica en que “é unha web de usuarios a empresas, cando o habitual é que os usuarios
fagan comentarios sobre empresas para influír na decisión de compra de outros”.
Esta
caixa virtual de suxestións ofrece unha canle de comunicación efectiva e
construtiva de utilidade tanto para as empresas como para os usuarios, pois
permite que o destinatario da suxestión interactúe co emisor aínda que este o
fixera de xeito anónimo, propiciando que os internautas perdan o medo a deixar
os seus comentarios sen posibles represalias e que os empresarios reciban
queixas e suxestións que doutra maneira descoñecerían.
A
ferramenta permite, por unha banda que os responsables das empresas melloren os
seus servizos de xeito continuo, e pola outra, que os clientes e usuarios comproben
que as súas suxestións e queixas foron recibidas pola persoa interesada e
reciban resposta.
No
tocante ao segundo ítem de interese para AJE Galicia, o da formación, a
organización apoia a iniciativa da consultora galega de formación Grupo Femxa,
que ten previsto realizar máis de 35 itinerarios de formación de balde para a
inserción ao mercado laboral de preto de 5.000 mozos e mozas desempregados.
As
accións formativas recollidas no plan oscilan entre as 160 e as 300 horas e,
como non podía ser doutra maneira, impartiranse na modalidade presencial e en
liña, o que lle facilitará aos alumnos e alumnas a asistencia ás clases.