Microsoft colaborará co CiTIUS na confluencia entre Intelixencia Artificial e medicina
xoves, 22 de xullo do 2021
O
CiTIUS da USC formalizou este mes de xullo un convenio de
colaboración coa compañía tecnolóxica Microsoft, que lle
brindará o seu apoio para o desenvolvemento de novas técnicas de
Intelixencia Artificial (IA) aplicadas a medicina. En particular,
esta nova vía de colaboración centrarase no eido da
oncohematoloxía, disciplina centrada no tratamento dos tumores que
se orixinan nos órganos encargados de formar o sangue e nos ganglios
linfáticos (incluíndo leucemias, linfomas e mieloma múltiple).
Segundo
explicou a Universidade de Santiago, trátase dunha liña de
investigación actualmente activa no centro de investigación
compostelán, en virtude dun recente acordo entre o CiTIUS e o
Instituto de Investigación Sanitaria de Santiago de Compostela
(IDIS).
O
apoio de Microsoft permitirá acadar “distintos fitos neste ámbito
de investigación”. Por unha banda, aplicaranse técnicas de
aprendizaxe automática (Machine Learning) para unha mellor
predición da supervivencia e optimización do tratamento dos
pacientes con mieloma múltiple; por outra, organizarase un encontro
específico de dúas xornadas para analizar dun modo máis xeral o
uso da Intelixencia Artificial en medicina.
A
primeira destas xornadas comezará cunha aproximación aos
fundamentos das tecnoloxías con capacidade de avaliar información a
gran escala e extraer conclusións, pautas e comportamentos, e,
tamén, a algunhas das súas aplicacións no ámbito da saúde,
presentando casos concretos de sistemas baseados no coñecemento e en
aprendizaxe automática (entre os que se incluirá o uso da
Intelixencia Artificial na loita contra a COVID-19). O segundo día
abordaranse aspectos prácticos relacionados coa privacidade e a
ética na aplicación da IA no ámbito médico, así como o uso das
tecnoloxías lingüísticas.
Amais,
organizarase outra actividade con formato de xornada de debate sobre
a proposta lexislativa da Comisión Europea para a elaboración dunha
lei de Intelixencia Artificial, cuxo borrador viu a luz o pasado 21
de abril de 2021.