Meteogalicia comeza ano intensificando visitas e amosando novidades na web
luns, 11 de xaneiro do 2016
Meteogalicia inicia 2016 cunha serie de actividades
que comparten nexo común: amosarse, impulsarse e ter máis e mellor
contacto e colaboración coa cidadanía. Para comezar, as
instalacións do servizo autonómico de predicións meteorolóxica
recibirán este martes ao primeiro grupo de alumnos que ao longo
deste ano visitarán as súas dependencias, un total de 56
alumnos de 1º e 2º da ESO do Colexio Bayón de Ribeira. Ao longo do
mes de xaneiro, un total de seis grupos de cinco centros de Primaria
e da ESO achegaranse até as súas dependencias. Nestes
e noutros encontros previstos (con alumnado de Bacharelato e
universitario, e tamén con diversas asociacións) aproveitarase para
amosar aos visitantes a optimización levada a cabo na web de
Meteogalicia.
Esta actualización do servizo en liña consiste “na
posta en marcha dun sistema de elaboración automática de
comentarios na predición a curto prazo específico para cada
concello”. O sistema, por certo, xa está dispoñíbel na páxina
meteogalicia.es.
Segundo fan saber os responsábeis do servizo, “este
reforzo da información é froito da colaboración entre Meteogalicia
e a Universidade de Santiago de Compostela (USC) para mellorar a
información sobre a predición meteorolóxica dos concellos que se
ofrece a través da páxina web”. As notas explicativas ofrecen o
prognóstico meteorolóxico e o índice de calidade do aire en cada
municipio galego. O comentario xérase de xeito automático a partir
da aplicación GALiWheather, empregando para isto técnicas de
intelixencia artificial e xeración de linguaxe natural. Segundo fan
saber dende a Xunta, outra das novidades introducidas na páxina web
é a predición da calidade do aire do día actual e os dous
seguintes, mediante unha escala de cores. A maiores, achéganse datos
das estacións meteorolóxicas pertencentes á rede de estacións
automáticas de Meteogalicia (na contorna do concello seleccionado) e
ademais a web contén gráficos coa evolución das temperaturas
máximas e mínimas a curto e medio prazo.