Metal Slug toma forma de tower defense

venres, 2 de maio do 2014 Marcus Fernández

A clásica saga de shooters de desprazamento horizontal para Neo-Geo, Metal Slug, conta con numerosas recreacións para dispositivos móbiles que permiten lembrar os xogos que causaran furor nos salóns recreativos, pero desta volta SNK Playmore sorprende con Metal Slug Defense, un título desta franquía totalmente novo, que atrévese a conservar os seus gráficos mudando a mecánica de xogo pola dun tower defense.

Metal Slug Defense conserva os gráficos dos xogos de acción anteriores

Temos así un xogo de estratexia en tempo real que podemos descargar de balde para Android e para iOS, no que dirixir as nosas tropas para devolver a orde ao mundo derrotando os postos dun malvado Donald Morden (personaxe inspirado en Saddam Hussein, Adolf Hitler e Joseph Stalin).
Haberá que xestionar máis de 60 personaxes e unidades dispoñibles, que poderemos desbloquear e potenciar avanzando no xogo ou a través da súa tenda (de aí que esteamos ante un título descargable de balde) e que incluso conta cun modo de xogo competitivo en liña.


Trailer de presentación deste novo xogo móbil

PUBLICIDADE