Mar Pereira anuncia en Vigo un compromiso firme co noso tecido empresarial TIC

xoves, 17 de decembro do 2009 Fernando Sarasketa

No marco da presentación (celebrada hoxe en Vigo) do manual TIC promovido por Ineo tamén houbo tempo para albiscar as estratexias a prol do fomento dixital que a Xunta vai poñer en marcha a curto, medio e longo prazo. De feito, contouse no auditorio da Zona Franca (lugar que deu acubillo á posta en longo da obra Sistemas de Información: Ferramentas prácticas para a xestión) coa presenza da secretaria xeral de Modernización, Mar Pereira, quen amais de salientar positivamente a natureza deste proxecto (como dixemos, unha guía para axudar ás nosas empresas a dixitalizarse), garantiu o compromiso do seu departamento en beneficio do dito sector empresarial.
Segundo informou durante a súa intervención, a aposta do Executivo galego por permitir un meirande desenvolvemento do noso talento é decidida: “O Goberno da Xunta sabe que as novas tecnoloxías son un magnífico instrumento para lograr o progreso económico na nosa comunidade, así como unha oportunidade para acadar a cohesión social e interna e potenciar a Galicia única”, subliñou.
Como dixemos, Mar Pereira tamén tivo palabras para a iniciativa presentada hoxe por Ineo, un manual TIC para as empresas que resume en boa medida a estratexia recente na que está envolta arestora a asociación Ineo. A secretaria xeral salientou “o firme propósito de Ineo de seguir impulsando as telecomunicacións, baseándose nas súas fortalezas: o talento dos profesionais, das empresas e o talento das universidades galegas”. Polo que atinxe ao libro, cualificouno de obra de referencia en canto á aplicación das novas ferramentas da información no eido empresarial, co obxectivo de modernizalo. Como proba da súa pegada, engadiu, fixo referencia a que as anteriores edicións da publicación están a ser empregadas en máis de 50 universidades de España e Latino América nas materias vinculadas á información.

PUBLICIDADE