Máis de trinta PEME galego-portuguesas participaron na xornada de Ineo sobre os mercados asiáticos
martes, 8 de outubro do 2019
A
Asociación de Empresarios de Tecnoloxía
de Galicia (Ineo) celebrou esta mañá na sede viguesa da CEP a
xornada Oportunidades de negocio multisectorial en China e India,
un evento enmarcado no proxecto de fomento da
internacionalización ECICII Plus que achegou aos asistentes claves
para iniciar ou ampliar procesos de internacionalización nestes
mercados. O director de operacións de Ineo, Luis Rey, foi o
encargado de inaugurar a xornada, desenvolvida en colaboración co
Banco Sabadell, detallando as oportunidades que brinda o dito
proxecto: unha iniciativa para as PEME galegas e do norte de Portugal
que lles axuda a abrirse camiño no mundo, poñendo o foco nas firmas
agroalimentarias ou de servizos intensivos de coñecemento. Na cita
de hoxe participaron máis de trinta representantes de empresas de
ámbalas beiras da raia.
Luis
Rey tamén salientou os catro grandes bloques de servizos que ofrece
o proxecto: diagnóstico, asesoramento, información e organización
de misións inversas e eventos de promoción no exterior. Sobre este
último punto, o director de operacións de Ineo lembrou que a
asociación ten prevista unha misión comercial a México, que se
celebrará a finais deste mes, orientada ao sector das Tecnoloxías
de Información e Comunicación (as TIC). “Desde a nosa entidade
coordinamos esta viaxe que permitirá promover os produtos e servizos
das PEME da Eurorrexión na Conferencia Internacional de
Investigación e Innovación en Enxeñaría de Software (CONISOFT) e
nas súas actividades asociadas”, informou.
Na
cita de hoxe tamén interveu Armando Priegue-Freire, socio director
de Axperia Ventures, moderador da xornada, quen esbozou algunhas das
características dos países protagonistas da xornada e fixo
referencia á experiencia das firmas galegas nestes mercados.
Hugo
Tian Hong, director do China Center de París e presidente do China
Source Capital Investment, que participou en grandes proxectos entre
China e Europa, foi o encargado de presentar as oportunidades de
negocio que brinda este país asiático ás PEME da Eurorrexión
Galicia-Norte de Portugal.
Tras
esta intervención, tomou a palabra Guillermo Montero, xerente de Mar
Ceibe, que contou a experiencia desta compañía galega que leva xa
seis anos exportando ostras frescas a China.
Logo,
Arun Kumar, conselleiro de Sunpower en India e socio de Axperia
Ventures en Nova Deli, e que conta con máis de 25 anos de
experiencia no sector energy utilities en India e Europa,
expuxo as características e oportunidades do mercado indio.
Na
mesma liña versou a intervención de Gonzalo Varela, director de GV
Solucións, que contou a experiencia da súa compañía na India e
como presentou no Water Impact Summit 2018 as súas solucións
tecnolóxicas para que as autoridades deste país resolvan problemas
no ciclo de auga.
Por
último, Javier Balbín, e director de Negocio Internacional en Banco
Sabadell, presentou os instrumentos de apoio que ofrece a entidade
financeira para a expansión das compañías cara a estes mercados. A
xornada finalizou cun café networking acompañado de reunións
bilaterais entre as empresas asistentes e os relatores da mesma.
Sobre
ECICII Plus
O
proxecto Estrutura Empresarial Conxunta para o Impulso e a Captación
de Iniciativas de Internacionalización, ECICII Plus, enmárcase
dentro do Programa INTERREG V-A España-Portugal (POCTEP) 2014-2020.
O seu obxectivo é “fortalecer a capacidade de internacionalización
das PEME da Eurorrexión a través da intensificación da cooperación
transfronteiriza e do aproveitamento das sinerxías da experiencia
galega e do norte de Portugal, apostando tamén pola experimentación
con modelos de internacionalización multisectorial”.