Máis de medio milleiro de expertos en seguridade participarán en marzo no María Pita DefCon
xoves, 29 de decembro do 2016
A
Facultade de
Informática da Coruña acollerá a partir do 6 de marzo o congreso
María Pita DefCon, un evento aberto e cen por cen participativo
que ten o obxectivo de xuntar o máis referencial do panorama actual
da seguridade informática. Segundo nos contan os organizadores, a
previsión é reunir baixo un mesmo teito (o da FIC) a máis de medio
milleiro de expertos en protección de sistemas e coñecemento. Amais
de seguridade informática dende unha chea de puntos de vista, tamén
se abordará a cuestión da fenda dixital de xénero, facendo fincapé
na visualización e integración da muller no eido das novas
tecnoloxías da información.
Detrás
deste evento, na organización, atópase un grupo de seareiros do
hacking ético: David Albela, Uxío Fuentefría Oróns, Juan
José González Cid, Raúl Oróns, Alejo Pacín Jul, Jesús Pérez
Rubio, Raúl Fernando Rodríguez Rubio, Daniel Somoza, Fernando
Suárez Lorenzo, José Manuel Vázquez Naya e María Pilar Vila
Avendaño.
As/os
impulsoras/es da xuntanza contarán co apoio da Facultade de
Informática da Universidade da Coruña, así como de múltiples
entidades (públicas e privadas) do mundo TIC. A cita desenvolverase
entre o 6 e o 12 de marzo de 2017. O obxectivo, en palabras dos seus
responsábeis, é dar forma ao “evento máis importante a nivel
galego sobre seguridade informática e reivindicación da muller no
plano tecnolóxico”. O programa artellarase nun cumprido feixe de
charlas, mesas redondas, obradoiros e concursos ao longo de toda unha
semana. A orixe de María Pita DefCon, segundo nos contan os
organizadores, está na necesidade de seguir debatendo e intercambio
coñecemento avanzado sobre xeitos de garantir as mellores condicións
para os datos e as comunicacións no dixital. Nun plano máis
concreto, o novo evento vén a cubrir o baleiro deixado trala “falta
de financiamento dun congreso de temática semellar que se viña
celebrando até agora na mesma localización”. A isto, sinala a
organización, cómpre engadir “a alta demanda de perfís de
seguridade informática dentro do sector e o interese mostrado por
diversas entidades, tanto públicas como privadas”. Dito doutro
xeito: o mundo reclama máis expertos en salvagarda das comunicacións
e coñecemento e está claro que dende a nosa terra estamos
capacitala para achegarllos.