Máis de douscentos profesores participan nas xornadas de innovación da UDC
xoves, 8 de novembro do 2018
Máis
de douscentos profesores da Universidade da Coruña participan estes
días na terceira edición das Xornadas
de Innovación Docente. E fano informándose de experiencias
novas no plano educativo, abeiradas en maior ou menor medida ás
tecnoloxías da información, e compartindo as súas propias
iniciativas. O
acto de inauguración estivo presidido polo reitor, Julio Abalde,
xunto coa vicerreitora de Oferta Académica e Innovación Docente,
Nancy Vázquez, e o decano da Facultade de Ciencias da Educación,
Manuel Peralbo, centro no que se desenvolven as xornadas.
Abalde
puxo o foco no “protagonismo no propio profesorado” que é o que
compartirá experiencias ao longo destes dous días e o que “ten
que facer o traballo de mellorar a súa metodoloxía docente que é
moito máis”, indicou o reitor, “que incorporar tecnoloxía
nova”.
Despois
do acto inaugural, interveu Antonio Fernández-Coca, vicerreitor de
Campus Dixital e Transmedia da Universitat de les Illes Balears, coa
conferencia Hai que saír do armario para entrar no armario:
diario dunha experiencia docente.
A
Universidade da Coruña organiza por terceiro ano as Xornadas de
Innovación Docente, programadas polo CUFIE (Centro de Universitario
de Formación e Innovación Educativa), dependente da Vicerreitoría
de Oferta Académica e Innovación Docente, nas que se presentarán,
até este venres 9 de novembro, máis de sesenta experiencias
docentes innovadoras, ademais de haber programadas diversas mesas de
debate.
O
programa de actividades deste 9 de novembro comeza ás 9.00 horas cos
GiEncontros (posta en común do traballo realizado polos Grupos de
Innovación Educativa da UDC) e prosegue ás 12.30 horas con sesións
simultáneas de comunicacións e, unha hora máis tarde, coa entrega
de diplomas da primeira promoción de profesorado novel formada co
programa virtual PFI do CUFIE.