Lugo aposta polos formatos en streaming para o seu primeiro congreso de turismo experiencial
mércores, 5 de agosto do 2020
Lugo
vai acoller en setembro un evento directamente encamiñado a
revitalizar e transformar o turismo da cidade, da provincia e dos
ámbitos galego e estatal. Estamos
a falar da primeira edición do Congreso Nacional de Turismo
Experiencial, que se celebra entre os días 16 e 18 e no que está
previsto que participen medio cento de expertos e profesionais. O
formato será unha mestura de formatos presenciais e virtuais,
ofrecendo a posibilidade de seguir os relatorios por streaming,
nas redes. O congreso complementarase, os días 19 e 20 de setembro,
co LugoExperience, un programa de actividades de lecer (culturais,
gastronómicas, ambientais e de aventura) pola provincia.
A
alcaldesa, Lara Méndez, participou este martes na presentación do
evento na praza Pio XII, acto no que tamén interviron a concelleira
de Turismo e Cultura, Maite Ferreiro, a deputada de Turismo, Pilar
García, e a delegada territorial en funcións da Xunta de Galicia,
Marta Barreiro.
Segundo
explicaron, a primeira edición combinará o formato presencial, con
conferencias no Pazo de San Marcos, e o virtual, ofrecendo a
posibilidade de seguir as charlas por streaming. A este
respecto, a rexedora fixo saber que “o feito de que os relatorios
se poidan seguir en directo de forma online facilitará que o
Congreso adquira unha dimensión nacional e internacional, o que
supón un enorme escaparate para Lugo”.
Pola
súa banda, a deputada de Promoción do Territorio e Turismo
salientou a aposta decidida da Deputación de Lugo por converter a
provincia nun destino multiexperiencial e intelixente: “Impulsamos
a adhesión da institución provincial na Rede de Destinos de
Turísticos Intelixentes e apoiamos a celebración deste congreso que
acollerá o Pazo de San Marcos porque axudará á creación dun
ecosistema colaborativo na provincia xuntando claves, ferramentas e
innovacións para reinventar e dinamizar ao sector a través do
turismo de experiencias”, subliñou.
O I
Congreso Nacional de Turismo Experiencial, engadiron, busca “ser un
referente no que abordar novos retos, ofrecer solucións, analizar
casos de éxito e dotar das ferramentas necesarias a profesionais
para que aproveiten as oportunidades do entorno local a través dun
emprendemento sustentábel”. Será, afondaron, “un punto de
encontro para profesionais, emprendedores, técnicos, produtores
locais, estudantes, guías, investigadores, medios de comunicación e
seareiros do turismo e a cultura en xeral”.
Amais
de relatorios farase especial fincapé na realización de actividades
complementarias a través de networking, workshops,
visitas de campo e accións de dinamización cos asistentes. Deste
xeito, celebraranse unhas Xornadas de Introdución á Creación de
Experiencias de Ocio e Turismo e, durante a fin de semana do 19 e 20
de setembro, celebrarase LugoExperience, que contemplará diferentes
actividades culturais, gastronómicas, de aventura... para dar
visibilidade ao comercio local.