Lowi estrea unha tarifa de fibra de 300 Mbps e 20 GB de datos no móbil por 39,95 euros/mes

mércores, 12 de agosto do 2020 Marcus Fernández

A competencia nos combinados de fibra óptica e móbil non cesa no verán, e Lowi reacciona á agresividade de ofertas como as de Virgin Telco e O2 lanzando a nova tarifa Simpli, que ofrece unha conexión de fibra óptica até o fogar a 300 Mbps e unha liña móbil con chamadas ilimitadas e 20 GB de datos por 39,95 euros/mes, coa posibilidade de engadir até 4 liñas móbiles adicionais coas mesmas condicións por 9,95 euros/mes.
Esta nova oferta bota a andar o 13 de agosto e manterase até finais de setembro, ou sexa, que a súa contratación é por tempo limitado (aínda que as condicións manteranse para sempre).
Lembremos que Lowi é o operador de baixo custo de Vodafone, que goza da calidade da rede dese operador, e entre as súas condicións carece de compromiso de permanencia, ofrece conectividade móbil 4G e, no que respecta aos datos móbiles permite tanto acumular os datos non empregados para o mes seguinte ou envialos a outra liña de Lowi en calquera momento do mes. A nova oferta desta compañía estaría moi próxima á de Virgin Telco, que ofrecería fibra de 300 Mbps e móbil con 20 GB de datos por 39 euros/mes, mentres que O2 tería na mesma liña fibra de 300 Mbps e 5 GB de datos no móbil por 38 euros/mes, coa diferenza de que esta última oferta incluiría liña de teléfono fixo.

PUBLICIDADE