Lily, o rexurdimento da cámara-dron

luns, 4 de setembro do 2017 Marcus Fernández

En 2015 unha campaña de micromecenado chamaba a atención por propor o uso dun pequeno dron como cámara voadora persoal, a Lily Camera, que finalmente foi un fracaso, de xeito que os seus responsables non foron quen de converter a súa idea nun produto comercial tras máis de 3 anos de traballo, e agora o proxecto resucita como Lily Next-Gen, unha actualización do dron orixinal, que mellora a súa cámara (que pasa de gravar vídeo Full HD e imaxes de 12 Mpíxeles a vídeo 4K e fotografías de 13 Mpíxeles) e incorpora novas prestacións como dron, seguindo en boa medida as tendencias marcadas por DJI, fabricante que xa ten un par de pequenos drons que claramente conquistaron o espazo que pretendía ocupar a Lily Camera.
Pero esta nova proposta vaino ter difícil, pois non só parte dun prezo de 499 dólares (o mesmo que un produto realmente solvente como o DJI Spark), senón que tal prezo sería só unha promoción de lanzamento (o prezo oficial sería de 699 dólares), e amais o produto chega da man doutro fabricante, Mota, quen mercou a marca Lily, pero non as patentes que facían a Lily Camera especial (vendidas a outra empresa), polo que realmente estariamos ante un novo dron que suplanta a identidade doutro coñecido para conseguir destacar nun mercado dominado por un único fabricante.

PUBLICIDADE