Lightworks estrea beta pública para OS X

martes, 10 de xuño do 2014 Marcus Fernández

O veterano editor de vídeo Lightworks, con máis de 20 anos de historia, está xa dispoñible para Windows e Linux, e finalmente lanzou unha beta pública para OS X, de xeito que os usuarios dun equipo de Apple que queiran botar un ollo a esta potente ferramenta poden descargar de balde a beta da versión 12.0, que conta aínda con bastantes limitacións e problemas coñecidos, pero que permite así avaliar se estamos ante un produto que podería axustarse ao noso fluxo de traballo no futuro.
Este editor de vídeo profesional tamén destaca pola súa estrutura de prezos, que é bastante flexible, pois tanto podemos pagar 214,99 euros polo produto completo, como podemos optar por subscribirnos ao mesmo por 59,99 euros/ano ou 5,99 euros/mes. Pero estamos a falar da versión profesional da aplicación, xa que a mesma tamén conta cunha versión de balde, que ten restrinxidas as funcionalidades de vídeo de alta calidade para orientarse claramente ao vídeo producido para a súa reprodución a través da Internet, o que pode contribuír a captar usuarios para a súa versión profesional. Mentres a versión de balde pode producir vídeos de ata 720p, a versión completa permite entregar vídeo en ultra alta definición, así como vídeo esteroscópico, soportando numerosos formatos de saída e soporte para as máis populares tarxetas de vídeo profesionais.
Cómpre lembrar que estamos ante unha aplicación para usos principalmente profesionais, polo que é bastante esixente en hardware, e o feito de contar cunha nova versión para OS X pode resultar de grande interese para os estudios de edición que traballen con diversidade de equipos informáticos, xa que contar cunha solución multi-plataforma pode flexibilizar considerablemente os contornos de traballo.

PUBLICIDADE