Lara Croft estrea xogo descargable

O Bazar de Xbox LIVE Arcade estreou hoxe o xogo Lara Croft and the Guardian of Light, que pode adquirirse por 1.200 puntos (14,4 euros) e que incluso conta cunha versión de demostración de balde. O xogo sorprende por ser o primeiro xogo de acción e aventuras multi-xogador cooperativo no que aparece Lara Croft, a protagonista da franquía Tomb Raider, conservando características habituais de tal saga de xogos coma a exploración, o descubrimento, as plataformas e a resolución de enigmas, así coma personaxes que evolucionan, un combate trepidante e elementos de cooperación e competición humana.
Estamos ante o primeiro título descargable de Lara Croft e do estudo Crystal Dynamics, que presenta uns gráficos impresionantes en perspectiva isométrica e cunha ambientación terrorífica, pois no xogo hai que enfrontarse a unha grande cantidade de espíritos de guerreiros mortos resucitados polo malvado Xololt, entre os que hai xefes finais que derrotar. Aínda que este título conta cun modo de xogo clásico, o seu potencial está no xogo cooperativo, no que Lara contará coa axuda de Tótec, personaxe capaz de manexar unha lanza e que tamén conta cun escudo (que, aparte de para cubrirse, tamén serve para elevar a Lara) de xeito que resultará importante en certos momentos do xogo.
Esta nova aventura de Lara Croft repártese en 14 fases, que poden completarse nunhas 6 horas (aínda que resulta rexogable). Está traducido ao español en voz e texto e, aínda que polo momento só está dispoñible para a Xbox 360, en breve sairá para PlayStation 3 e PC a través da PlayStation Network e Steam respectivamente.

Trailer do xogo primeiro xogo cooperativo descargable de Lara Croft